Qırım Müftisiniñ Qırım Cumhuriyeti ve Sevastopol şeerinde ÜFSİN ile işbirlik boyunca yardımcısı, Aqmescit şeeriniñ baş imamı Muhammed İslamov Aqmescit şeeriniñ №1 Tüzeltüv koloniyasınıñ hadimleri içün İslâm dininiñ temelleri boyunca lektsiya keçirdi. İşbu müessisede farqlı dinlerni temsil etken insanlar ceza çekkeni ve çalışqanı köz ögüne alınaraq, tüzeltüv koloniyasınıñ hadimleri İslâmnıñ ananeviy qıymetleri aqqında haberdar olmalı.
“Maneviy ğıdanıñ yoqluğı, ananeviy İslâm aqqında bilginiñ olmağanı çeşit fırqalarnıñ ve ekstremizmniñ inkişafına yol aça. Bizim vazifemiz – vatandaşlarımızğa ananeviy İslâmnıñ printsipleri aqqında bilgi bermek. Koloniyanıñ memuriyetine şu müim tedbirniñ keçirilüvine destek köstergeni içün teşekkür bildirem”, – dep, qayd etti Muhammed İslamov.
Bundan da ğayrı, Muhammed İslâmov Qırım Cumhuriyeti ve Sevastopol şeeri musulmanları diniy idaresiniñ (Tavriya Müftiyatı) faaliyeti aqqında tarif etti. Körüşüv devamında lektsiya diñleyicileri suallerini berdiler. Qırım Müftisiniñ yardımcısı bildirgenine köre, yaqın zamanda daa bir lektsiyanıñ keçirilmesi planlaştırıla.
Qırım MDİ matbuat hızmeti