Qırım Müftisi hacı Emirali Ablayev ve Qırım musulmanları diniy idaresiniñ (Tavriya Müftiyatı) hadimleri Qırım Müftisiniñ mesül kâtibi Ayder Acimambetovnıñ qorantasına babası Amet Acimambetovnıñ ölümi munasebetinen teren taziye bildireler.
“Biz Amet Acimambetovnıñ qorantasına, tuvğanlarına içten taziyemizni bildiremiz, şu acığa dayanmaq içün Allah küç ve sabır bersin. Allah rahmet eylesin. Allah Taalâğa dua etip, ebediy ayatta Amet Acimambetovnı derecesini arttırmasını tileymiz. Amin. Epimiz Allah içünmiz ve qaytuvımız Oñadır!”, – dedi Müfti efendi.
İhtar. Amet Acimambetov 1940 senesi Qırım Muhtar Sovet Sotsialistik Cumhuriyetinde, Aqmescit rayonınıñ Töbe Çoqraq köyünde dünyağa keldi. Üç yaşında olğanda, Qırımdan sürgün etildi. Qorantasınen beraber Kuybışevoğa tüşti. Mahsus rejim lâğu etilgen soñ, 1956 senesi qorantasınen beraber Özbek SSC-niñ Taşkent vilâyetine köçti. Mında Amet Acimambetov büyüdi, tahsilini aldı. 1967 senesi Feride İbragimovanen evlendi. Qoranta sekiz balanı östürdi. 1996 senesi Acimambetovlar qorantası Ana-vatanlarına köçip keldi, ve Saq rayonınıñ Yarkoye köyünde yerleşti. Amet Acimambetov büyük asabalıq qaldırdı, onıñ 17 torunı ve 3 torundan torunı bar.
Qırım MDİ matbuat hızmeti