Qırım Cumhuriyeti ve Sevastopol şeeri Müftiligi Qırım Cumhuriyetiniñ Cemaat Palatası tarafından teklif etilip, Qırım ealisini kütleviy şekilde aşılamaqnı közde tutqan “Qırım millionı” aktsiyasına qol tuta. Bunı Qırım Cumhuriyeti Cemaat Palatasınıñ COVID-19 hastalığınen alâqalı vaziyet kerginleşkeni munasebetinen keçirilgen oturuşında iştirak etken Qırım Müftisiniñ muavini Ayder İsmailov bildirdi.
“Cumhuriyette hastalarnıñ sayısı artqanı sebebinden ve vatandaşlarımıznı qorumaq maqsadınen diniy erbaplar Cemaat Palatasınıñ “Qırım millionı” aktsiyasına qol tuta, çünki insanlarnıñ ayatı ve sağlığını saqlamağa yönelik er bir tedbir bizler içün birinci yerdedir”, – dep qayd etti Ayder İsmailov.
Bundan da ğayrı, o, qayd etti ki, Qırım camilerinde 2020 senesiniñ baarinde hastalıqnıñ darqalmaması maqsadınen kirsetilgen qaidelerge aynen riayet etilmekte.
“Qırım Müftisiniñ emirinen kirsetilgen bütün tehlikesizlik tedbirlerine riayet etilmekte. Bular – kütleviy ibadetlerniñ keçirilüvi esnasında tutulğan içtimaiy mesafe, binalarnıñ sanitar işlevi, antiseptik vastalarınıñ qullanıluvı, şahsiy namazlıqlarnıñ ketirilmesi ve maskalarnıñ taqılmasıdır”, – dep açıqladı Ayder İsmailov.
“Biz kene vatandaşlarımıznı öz sağlığı ve etraftakilerniñ sağlığı içün mesülietli olmağa çağıramız. Hususan, bu esli başlılarımız içün müimdir. Turistik sezon başlanğanını da köz ögüne almalımız”, – dep, qayd etti Qırım Müftisiniñ muavini.
Qırım Cemaat Palatası Qırım başlığı Sergey Aksönovğa muracaat etip, ealiniñ kütleviy şekilde aşılanıluvını, ve, hususan, halq yaşayışını teminlegen ve çeşit hızmet müessiselerinde çalışqan mütehassıslarnıñ ve yarımadağa raatlanuv ve tedaviylenüv içün kelgenlerniñ mutlaq aşılanmasını teşviq etecek fermanlarnıñ çıqarılmasını rica etti.
Cemaat Palatası azalarınıñ fikirince, vaziyet kerginleşüviniñ sebepleri – maska taquv rejiminiñ kevşemesi ve ealini aşılav ceryanınıñ yavaş ketmesidir. Toplaşuvnıñ iştirakçileri qayd ettiler ki, qırımlılar arasında kütleviy immunitetke ancaq “Saglıq nazirligi ile Qırım Cumhuriyeti akimiyet organlarınıñ ortaq ğayretlerinen” irişmek mümkün. Bunıñ içün Cumhuriyetniñ Cemaat Palatası Qırımda ealiniñ aşılanmasınen alâqadar kütleviy “Qırım millionı” aktsiyasını keçirmege teklif etti.
Mezkür muracaatta bildirilgenine köre, ancaq bu qadar insan aşılavdan keçse, qırımlılar ve yarımadamıznıñ musafirleri içün ayat tehlükesizligi teminatı berile bile.
Qırım MDİ matbuat hızmeti
