Qırım Cumhuriyeti ve Sevastopol şeeri musulmanları diniy idaresi “Merhametlik lâlesi” hayriye aktsiyasını başlay. Aktsiya “Balalarnıñ ellerinen ve büyüklerniñ eyi niyetinen yapılğan merhametlik” şiarı astında keçirilecek ve 2020 senesiniñ dekabr 10-26 künleri arasında devam etecek.
Aktsiyada iştirak etmek içün Aqmescit mektepleriniñ talebeleri davet etildi. Olar öz ellerinen aktsiyanıñ timsali olğan lâleni yapacaqlar, ileride ise, elyapmalar satılacaq ve toplanğan paralar paalı tedaviylevge muhtac balalarnıñ qorantalarına berilecek.
“Merhametlik lâlesi” hayriye aktsiyası Qırım Cumhuriyeti ve Sevastopol şeeri musulmanları diniy idaresi tarafından Aqmescit şeer memuriyetiniñ başlığı Yelena Stepanovna Protsenkonıñ qoltutuvı ile “Merhametlik” aktsiyası çerçivesinde keçirile. İşbu aktsiya 2009 senesi Qırım Müftiligi tarafından teşkil etilip devam etmekte. Şu vaqıt içinde tedaviylevge muhtac qorantalarğa 21 182 009 ruble toplanıp berildi. “Merhametlik” aktsiyası aqqında tafsilâtlı malümatnı QMDİ resmiy saytında ögrenmek mümkün: www.qmdi.ru.
QMDİ matbuat hızmeti