İyünniñ 26-sında Qırımda Qırımtatar bayraq künü qayd etildi. Tedbir Aqqaya dağı eteginde Qırım Cumhuriyeti ve Sevastopol şeeri musulmanları diniy idaresiniñ patronatı altında ve Qırım Devlet milletlerara komitetiniñ destegi ile keçirildi. Bütünqırım tedbirniñ teşkilâtçısı “Qırımlılar” cemaat teşkilâtı oldı.
Qırım Müftisi adından toplanğanlar ögünde Müfti muavini Esadullah Bairov çıqışta bulundı. O, er kesni qırımtatar bayraq kününen hayırlap, ecdatlarımıznıñ ğururına lâyıq işlerni yapmaqnı tiledi.
“Qırımtatar milleti özüniñ simvolları olğan bayrağına, gimnine, dinimizge, medeniyetimizge, urf-adetlerimizge büyük qıymet bere. Bularnıñ episi milletimizniñ temeli, menligidir, şu degerler etrafında biz inkişaf etemiz. Er birimizniñ vazifesi – milletimizniñ birligi, inkişafı, güllemesi içün ğayret etmektir. Bugünki kün ise, milletimiz ecdatlarınıñ hatırasına, bayrağına ve vatanına ürmet etkenini temsil ete”, – dedi Esadullah Bairov.
Buña ilâve olaraq, Esadullah efendi Qırım Müftisi adından bayram teşkilâtçılarına teşekkür bildirdi.
Qırımtatar milliy bayraq künü iyün 26-da qayd etile.
İlki olaraq, şu bayraq 1917 senesi І Milliy Qurultay tarafından qabul etilgen edi.
1991 senesi, iyün 30-nda ІІ Milliy Qurultay tarafından, o, tekrar, milliy bayraq olaraq qabul etildi.
Qırımtatar milliy bayraq künü 2010 senesi, iyün 26-dan başlap qayd etile.
Qırım MDİ matbuat hızmeti
