Seyit Settar diniy külliyesinde din erbapları, halq medresesiniñ talebeleri Qırım ve Sevastopol şeeri musulmanları diniy idaresi (Tavriya Müftiyatı) Müftisiniñ muavinleri Raim Ğafarov ve Ayder İsmailovnıñ rehberliginde Mevlid meramisimini keçirdiler. Şu merasimniñ maqsadı – Peyğamberimiz Muhammed Mustafanıñ (s.a.s.) ömürini ve şahsiyetini añmaq ve añlatmaqtır. Şübesiz, Peyğamberimiz (s.a.s.) aqqında suhbette bulunmaq, onıñ ayatından ibretli ikâyeler diñlemek pek savaplı bir iştir. Peyğamberimiz özü de keçmiş ümmetlerniñ ayatından ikmetli qıssalar añlatmağa seve edi.
Mevlidni keçirüv şekli de dinimizge esaslanğan hayırlı amellerden ibaret, – musulmanlar bir arağa kelip, Yüce Allahnı añalar, Peyğamberimizge salâvatlar ketireler, Resulüllah doğğanı ve biz onıñ ümeti olğanımız munasebetinen Allah Taalâğa şükür eteler, diger ibadetlerni eda eteler, hayırlı işler yapalar.
Mevlid merasimi – Allahnı añmaq, dinimizge daa çoq sarılmaq içün eñ güzel vastalardan biridir. Ayrıca din erbapları ve alimlerimiz İslâmğa davet hızmetinde Peyğamberimizniñ (s.a.s.) güzel ahlâqını, bizim içün nümüne olğan ayat tarzını, ibadeti ve ayatnıñ er saasını qavrap alğan amellerini añmaq ve añlatmaq kerekler.
QMDİ matbuat hızmeti