Din erbapları ve “Halq medresesi” leyhasınıñ talebeleri Qırım Cumhuriyeti ve Sevastopol şeeri musulmanları diniy idaresi (Tavriya Müftiyatı) Müftisiniñ muavini Raim Ğafarov başlığında Aqmescit rayonınıñ Sofiyevka köyü camisinde Mevlid-i Şerifni oqudılar.
İhtar: Mevlid-i Şerif degende, musulmanlarnıñ bir arağa kelip, Muhammed Peyğamberniñ (s.a.s.) yaşayışı ve ögretkenlerine, onıñ maqtalmasına bağışlanğan suhbetniñ keçirilmesi ve, ananeviy olaraq, şu mevzuda yazılğan şiiriy eserlerniñ ve ilâhiylerniñ icra etilmesi közde tutula. Musulmanlar Mevlid mejdlislerinde Yüce Allahnı añalar, Peyğamberimizge (s.a.s.) salâvatlar ketireler, Resulüllah doğğanı ve biz onıñ ümmeti olğanımız munasebetinen Allah Taalâğa şükür eteler, diger ibadetlerni eda eteler, hayırlı işler yapalar.
Mevlid merasimi – Allahnı añmaq, dinimizge daa çoq sarılmaq içün eñ güzel vastalardan biridir. Ayrıca, din erbapları ve alimlerimiz İslâmğa davet hızmetinde Peyğamberimizniñ (s.a.s.) güzel ahlâqını, bizim içün nümüne olğan ayat tarzını, ibadeti ve ayatnıñ er saasını qavrap alğan amellerini añmaq ve añlatmaq kerekler.
QMDİ matbuat hızmeti