Bu seneden başlap Qırım hacıları içün Hacılıqnıñ mobil ilâvesi çalışmağa başlaycaq. Mahsus ilâve Saudiya Arabistan Qırallığınıñ Mekke ve Medine muqaddes topraqlarına yol alacaq hacılar içün işlep çıqarıldı. İlâve ile interneti olğan smatfonlarda qullanmaq mümkün. Hacılar onı Play Market AppStore-da bedava yükley bileler.
AVN-TUR hacılıq-operatorınıñ reberi Artur Reşitovnıñ sözlerine köre, mobil ilâvede hacılıqqa barğan insan aqqında bütün malümat bar. Kendisini şahsiy kabinette cedvelde tapıp, qaysı gruppada olğanını, kelüv ve çıquv künlerini, reysniñ nomerası ve Saudiya Arabistan Qırallığında musafirhaneniñ adını tapmaq mümkün. “Mahsus hacılar içün “SOS” dögmesi bar – eger hacı coyulsa, bu dögmenen qullanabile. Signalnı alıp, gruppa reberi onıñ bulunğan yerini körip, hacınen bağlana ve yardım kösterebile”, – dep ayttı Artur Reşitov.
Bu sene hacılıqqa barmaq istegenlerniñ kvotası 600 yerge qadar arttırıldı. Al-azırda hacılarnıñ çetel pasportları azırlandı. Hacılarnıñ birinci gruppası 2018 senesi avgustnıñ 3-nde yolğa çıqacaq.
QMDİ matbuat hızmeti
