Aqmescitte Qırım Cumhuriyeti ve Sevastopol şeeri Müftisiniñ Qırım Cumhuriyeti ve Sevastopol şeerinde UFSİN ile işbirlik boyunca yardımcısı, Aqmescitniñ baş imamı Muhammed İslamovnıñ QC ve Sevastopol şeeri boyunca UFSİN başlığı vazifesini vaqıtınca icra etken içki hızmet polkovnigi Sergey Suvorovnen körüşüvi olıp keçti.
Körüşüv devamında yapılğan işlerniñ neticeleri çıqarıldı ve Qırım MDİ ve Qırım Cumhuriyeti ve Sevastopol şeeriniñ UFSİN-i arasında 2021 senesiniñ soñuna qadar işbirlik planları belgilendi.
Aqmescit rayonınıñ Sarabuz qasabasındaki Tüzetüv merkezini ziyaret etmek ve şartlı olaraq mahküm etilgenler içün lektsiyalar ve diger tedbirler keçirmek planlaştırıldı.
“Maneviy, diniy terbiye insannı nizamğa çeke. Bu yönelişte işimiz devam etecek. Maqsadımız – hata yapqan insanlarnı cemiyetke qaytarmaq ve olarğa aynı maneviyatnıñ ayatlarını yañıdan başlamağa yardım etecegine, ayatları bitmegenine işandırmaqtır. Yazıq ki, pandemiya zamanında işlerni keñleştirmek imkânı yoq, amma bu saada işler devam ete”, – qayd etti Muhammed İslamov.
Mahkümler ve tahqiqattan keçkenler arasında virus hastalıqları ve şahsiy temizlik profilaktikası boyunca da suhbetler keçirilmekte.
Qırım MDİ matbuat hızmeti