Qırım Müftisi hacı Emirali Ablayev qırımtatar milliy areket veteranı Veciye Kaşkanıñ yaqınları, soy-soplarına teren taziyelerini bildirdi. “Qırım musulmanları diniy idaresi adından ve şahsen öz adımdan ömürini milletimizniñ Vetanına qatmasına bağışlanğan Veciye Kaşkanıñ ölümi sebebinden teren taziyelerimni bildirem. Veciye Kaşkanıñ adı er bir qırımtatarnıñ yüreginde ebediy qalacaq. Biz onıñ qorantasınen beraber keder içindemiz, yaqınlarına tazilerimizni bildiremiz”.
Allaqa onıñ canına merhametlikni kösterip, cennet bağlarına kirsetmege yalvaramız. Allahtan keldik ve Allahqa qaytamız. Veciye Kaşkanıñ qorantası birinciler sırasında Qırımğa qaytıp keldi, amma daa eki kere Vetanından sürgün etildi. Qırımğa qaytıp kelgen soñ Veciye Kaşka milliy arekette öz işini devam etti. O milletimiz içün candan qayğırğa siyrek adamlardan biri edi. Veciye Kaşka 83 yaşına kelip, faniy dünyanı terk etti.
Allah rahmet eylesin.