Aqmescitte Qırım Cumhuriyeti ve Sevastopol şeeri musulmanları diniy idaresiniñ “Faydalı ilim” maarif leyhası çerçivesinde İslâm temelleri boyunca hanım ocalar içün üç künlük ihtisas yükseltilüvi kursları olıp keçti. Forum Seit Settar külliyesinde olıp keçti.
QMDİ tasil bölügi tarafından azırlanğan kurslarnıñ programmasını tecvid oqutıluvınıñ usuliyeti boyunca qısqa kurs, musulman etiketi boyunca seminarlar, psihologik treningler, maruzalar ve tögerek masalar teşkil etti.
“Hanefiy mezhebinde fetva berüvniñ esas printsipleri” ve “İslâm aqaidiniñ aktual problemaları” mevzulı maruzalarnı fıqıh boyunca magistr, Qırım Müftisiniñ muavini Ayder İsmailov ve ilâhiyatçı, Qırım Müftisiniñ muavini Esadullah Bairov oqudı. “Musulman qorantasında buhranlar ve olarnıñ çezilüvi” maruzasınen “Faydalı ilim” leyhasınıñ reberi, ilâhiyatçı-ruhiyatçı Zeyneb Bairova çıqışta bulundı.
Buña ilâve olaraq, ihtisas yükseltilüvi kursları çerçivesinde “Yañı usul” tögerek masası keçirildi. İşbu tögerek masada ocalar diniy maarif saasında yañı usuliyet çalışmaları ve usullarnen tanış oldılar.
Umumen, ihtisas yükseltilüvi kurslarından Qırımnıñ farqlı köşelerinden kelgen 55 oca keçti. Zeyneb Bairovanıñ sözlerine köre, kurslarnıñ maqsadı – diniy bilgi seviyesini yükseltmek, Qırımda İslâm tasiliniñ seviyesini kötermek içün teşviq ve farqlı yaş gruppalarına oqutuvnıñ yañı usul ve şekillerini menimsemektir.
“Biz bu 20 akademik saatqa tögerek masalarnı da kirsetip, büyük mevzu spektrini qavrap almağa tırıştıq. İşbu tedbirimizniñ esas maqsadı – diniy maarif sistemamızğa endi qoşulıp kelgen yaş mütehassıslarğa destek olmaqtır”, – dep ayttı Zeyneb Bairova.
Kurslarnıñ soñunda ocalar ihtisas yükseltilüvini tasdıqlağan sertifikatlar aldılar.
QMDİ matbuat hızmeti
