Qırım Cumhuriyeti ve Sevastopol şeeri musulmanları diniy idaresinde “Merhametlik lâlesi” aktsiyasınıñ neticeleri çıqarıldı. “Merhametlik lâlesi” aktsiyası 2020 senesiniñ dekabr 10-26 künleri arası Aqmescit şeeriniñ başlığı Yelena Protsenkonıñ destegi ile olıp keçti.
Hatırlatamız ki, aktsiyada Aqmescit şeer mektepleriniñ talebeleri iştirak etti, olar öz ellerinen aktsiyanıñ timsali olğan lâlelerni yaptılar. Soñra ise, lâleler “Balalarnıñ ellerinen ve büyüklerniñ eyi niyetinen yapılğan merhametlik” şiarı astında Aşan ve Tsentrum ticaret merkezlerinde satıldı.
Toplanğan yardımnı hasta balalar olğan qorantalarğa Qırım Müftisi hacı Emirali Ablayev teslim etti. O, balalarnıñ yaqınlarına küç ve sabır, balalarğa ise, tezce tedaviylenip, şifa tapmalarını tiledi.
Aktsiya çerçivesinde 120 biñ ruble toplanıldı. Paralar ağır hasta balaları olğan altı qorantağa berildi.
Qırım MDİ matbuat hızmeti
