Qırım Cumhuriyeti ve Sevastopol şeeri musulmanları diniy idaresinde Müfti efendiniñ rayon imamlarınen iş körüşüvi olıp keçti. Adet üzre, din erbapları içün seminar olıp keçti, o, musulmanlarnıñ eki bayramından biri olğan Qurban bayramına bağışlanğan edi. Qırım Müftisiniñ muavini Raim Ğafarov insaniyetlikniñ tarihında farqlı milletlerde qurban etilmesiniñ tarihı ve İbraim ile İsmailnen (a.s.) bağlı vaqialar işbu ananelerni lâğu etkeni aqqında tarif etti. Seminarnıñ soñunda imamlar içün test keçirildi.
Qurban meselesi aqqında, hususan, qurban çaluvına nasıl azırlanmalı, kim qurban çalmaq kerek, qurbanlıq ayvanda nasıl şartlar olmaq kerek, quraban çalınacaqta mekruh olğan areketler aqqında Qırım Müftisiniñ muavini Ayder İsmailov tarif etti.
Rayon imamları ile körüşüvi esnasında Qırım Müftisi hacı Emirali Ablayev imamlarğa daa bir kere muracaat etip, koronavirus infektsiyasınıñ darqalmaması içün kerekli tedbirlerge riayet etmek meselesinde ealinen aktiv şekilde çalışmağa çağırdı.
“Artıq ekinci yıl devamında pandemiya toqtamay, biz tehlikenen yüz-yüzgemiz, ekinci yıldır dünya musulmanları hacılıq ibadetini yerine ketirip olamay. Bu künler tarihqa keçecek. Amma, er kün ve er saat biz milletimiz, onıñ sağlığı ve eyiligi içün mesüliet duymaq kerekmiz. Vaziyet ğayet ciddiy, ve bu halqnıñ tehlikesizlik meselesidir. Er kes qararını özü ala. Ekimler, mütehassıslar bar, işançlı menbalarğa muracaat etiñiz ve farqlı emiş-demişler ve qorquzuvlar peşinden ketmeñiz. Bugün aynı siz milletimiz içün mesülietlisiñiz”, – dedi Müfti.
İş körüşüvi çerçivesinde din erbapları keçken ayda yapqan işlerinden esabat berdiler ve kelecek ayğa planlarını muzakere ettiler. Hususan, cami topraqlarınıñ resmiyleştirilüvi, kommunal hızmet ücretiniñ vaqıtında tölenilüvi, camilerniñ qurucılığı ve tamirlevi, mekteplerdeki yaz tatili devamında balalar içün diniy tahsil tedbirlerniñ teşkil etilüvi.
Qırım MDİ matbuat hızmeti
