Qırım Cumhuriyeti ve Sevastopol şeeri musulmanları diniy idaresinde qırımtatar tilini ögrenüv kurslar açıldı. Oquv ceryanınıñ başlanmasından evel oqumağa kelgenler içün kiriş dersi keçirildi.
Talebelerni oquvnıñ başlanuvı ile Qırım Müftisiniñ muavini Ayder İsmailov hayırladı. O, talebelerge tuvğan tiliniñ ögrenilüvinde muvafaqiyetler tiledi, qırımtatar tili tuvğan tili olmağanlarğa ise, faydalı bilgiler almaqnı tiledi.
“Ümüt etemiz ki, kurslar tuvğan tili boyunca bilgileri zayıf olğan qırımtatarlar ve diger millet vekilleri içün faydalı olur. Çünki bir milletniñ tilini ögrengende biz bu milletni daa yaqın tanıy bilemiz”, – dep, qayd etti Ayder İsmailov.
Kurslarnıñ programması tilni endi ögrenip başlağan talebeler içün tizilgen. Bundan da ğayrı, dersler çerçivesinde kurs iştirakçileri nutuq tecribesini, qırımtatar tilinde yazma ve oquv tecribesini ala bilecekler.
Kurslarnı qırımtatar tili ve edebiyatı ocası Aliye Seferşayeva alıp baracaq. Dersler aftada eki kere (salı ve cumaaqşamı künleri) keçirilecek. Kurslarnıñ programması 3,5 ay devam etecek.
QMDİ matbuat hızmeti
