Qırım ve Sevastopol şeeri müsulmanları Diniy idaresinde qırımtatar tiliniñ ögrenilüvi boyunca nevbetteki kurs çalışıp başlandı. Oquv ceryanı başlamadan evel tanışuv dersi keçirildi.
Oquvnıñ başlanuvı ile diñleyicilerni, Qırım Müftisiniñ muavini Ayder İsmailov hayırladı. O, tuvğan tilniñ ögrenilüvinde muvafaqiyetler tiledi, qırımtatar tiliniñ taşıyıcıları olmağanlarğa ise faydalı bilgi almağa tiledi.
“Tilde er bir milletniñ medeniyeti ve zenginligi saqlıdır. Qırımtatar tilini ögrenmege başlar eken, siz qırımtatar medeniyeti, urf-adetleri, maneviy dünyasınen tanış olasıñız. Tilimiz – bizim baylığımızdır ve onı saqlamaq, er saada serbest qullanmaq içün qollarımızdan kelgenini yapamız. Bundan da ğayrı, biz Cümhuriyetniñ devlet tillerinden biri olğan qırımtatar tilini ögrenmege qarar alğanlarğa minnetdarmız”, – dep ayttı Ayder İsmailov.
Kurslarnıñ programması qırımtatar tilini endi ögrenmege başlağanlar içün tertip etilgen.
Bundan da ğayrı, dersler çerçivesinde talebeler qırımtatar tilinde qonuşuv, oquv ve yazuv tecribesini ala bilecekler.
Derslerni, qırımtatar tili ve edebiyatı ocası Tamila Abduveliyeva alıp bara. Kurslar aftada eki kere (salı ve cumaaqşamı künleri) keçirilecek. Kurs programması 3 ay devam etecek.
QMDİ MDT matbuat merkezi
