Qırım Cumhuriyeti ve Sevastopol şeeri musulmanları diniy idaresinde nevbetteki aylıq imamlar toplaşuvı olıp keçti.
Adet üzre toplaşuv diniy seminardan başlandı. Lektsiyanı Qırım Müftisiniñ muavini Ayder İsmailov keçirdi. Fıqıh magistri “İman” mevzusını açıqladı.
Toplaşuvda imamlar 2021 senesi, mayıs 23 künü yol qazası neticesinde bu dünyanı terk etken Qurman rayonınıñ baş imamı Arsen Yağlıyevniñ hatırasına dua oqudılar.
Toplaşuv esnasında din erbapları keçken ayda rayonlarda yapılğan işleri içün esabat berdiler. Hususan, mubarek Ramazan ayı devamında keçirilgen hayriye aktsiyaları ve qırımtatar halqınıñ Qırımdan sürgün etilmesiniñ 77-yıllığı munasebetinen keçirilgen tedbirlerniñ neticesi çıqarıldı. Hatırlatamız, mayıs 18 künü Qırımnıñ bütün camilerinde halqımıznıñ vatanından zorbalıqnen sürgün etilmesiniñ qurbanları hatırasına dualar oquldı.
Bundan da ğayrı, imamlar Qurban bayramına azırlıqnı, sadaqa ve yaz tatilinde rayonlarda İslâm temelleri kurslarınıñ keçirilüvi, bunıñ kibi diger meselelerni muzakere ettiler.
Qırım Müftisi hacı Emirali Ablayev imamlarğa muvafaqiyetli çalışmalar tilep, COVID-19 hastalığınıñ darqalmaması içün añlatuv işlerini muntazam şekilde tekrarlap alıp barmalarını tevsiye etti.
Qırım MDİ matbuat hızmeti
