Qırım Cumhuriyeti ve Sevastopol şeeri musulmanları diniy idaresinde (Tavriya Müftiligi) Müfti hacı Emirali Ablayevniñ rehberliginde rayon imamlarınıñ er aylıq toplaşuvı olıp keçti. Qırım musulmanlarınıñ yetekçisi Aqmescit rayonındaki Colman (Pionerskoye) köyüniñ camisinde olıp keçken vaqiağa ayrı urğu yaptı.
“Biz qabul etilmez bir vaziyetnen qarşılaştıq. Selefiylik dep özüni tanıtqan fırqacı mefküresiniñ mensüpleri ananeviy İslâmnıñ nurunı yayğan imamımızğa qollarını köterdiler. Sizni camige kelgen cemaatnen fırqacı mefküresiniñ havflılığı mevzusında añlatuv suhbetlerini keçirmege çağıram”, – dedi hacı Emirali Ablayev.
Körüşüv esnasında din hadimleri mubarek Ramazan ayında iftarlarnıñ keçirilüvinen bağlı meselelerni muzakere ettiler. Bundan da ğayrı, uquqiy meseleler de qonuşıldı. Hususan, bütün din cemiyetlerine ait obyektlerniñ (saalarnıñ) antiterror qorçalavı boyunca pasportlarnen teminlev meselesinde teşkiliy, müendislik ile tehnikiy ve diger tedbirlerniñ alınmasını talap etken 2019 senesi, sentâbr 5 tarihlı №1165 RF Akiyemiyetiniñ Qarırına binaen imamlar içün havsızlıq pasportlarınıñ qayd etilip, remiyleştirilmesi meselesi añlatıldı.
Toplaşuvnıñ soñunda rayon imamları QMDİ neşiri “Hidayet” gazetasınıñ yañı sanını bölgelerde musulmanlarğa darqatmaq içün aldılar.
QMDİ matbuat hızmeti