Qırım ve Sevastopol şeeri musulmanları diniy idaresiniñ “Faydalı ilim” diniy-maarif leyhası endi 2 kere Rusiye Federatsiyasınıñ eñ güzel musulman qadın leyhası olaraq tanıldı. Ğalipler kubogı 2019 senesi iyün 21 künü Moskvada “Aile – İslâm medeniyetiniñ baqışı ile cemiyetniñ içtimaiy institutı olaraq” VII musulman qadınlar teşkilâtlarınıñ Bütünrusiye toplaşuvı devamında berildi.
Birinci kubok 2018 senesi berilgen edi.
“Aişa” Halqara qadınlar klubı tarafından teşkil etilgen tedbirde Rusiyeniñ 30 regionından kelgen 100-den ziyade qadın teşkilâtınıñ reberleri iştirak etti. Qırım Cumhuriyetini ilâhiyatçı-ruhiyatçı Zeyneb Bairova, sual-cevap diniy rubrikasınıñ alıp barıcısı Niyare Ablayeva ve Qırımdaki musulman blogeri Niyara Nagayeva temsil ettiler.
Zeyneb Bairovanıñ sözlerine köre, bu sene eñ güzel musulman qadın teşkilâtları yarışında 13 birleşme iştirak etti. Eñ güzel leyha olaraq “Faydalı ilim” (Qırım Cumhuriyeti) ve Saratov ş. MDİ “Çoqraq” Qadın cemaat teşkilâtı tanıldı.
Zeyneb Bairova: “Biz forumğa ciddiy azırlandıq. Qasevet ettik, çünki eñ güzel teşkilât seçilmek kerek edi. Eñ yüksek baalarnı alğanımız içün, pek quvanamız. Bu –ocalarımıznıñ, çalışıp teşkilâtımıznı inkişaf etken insanlarnıñ ğalebesidir. Elbette, daimiy destek ve yardım içün, ğayelerimizni, fikirlerimizni ömürge keçirmege yardım etken Müftimizge – hacı Emirali Ablayevge büyük teşekkürler bildiremiz. Biz bahtlımız!”, – dep teessüratlarnen paylaştı.
“Faydalı ilim” – faaliyetini 2014 senesiniñ iyül ayında başlağan Qırım ve Sevastopol şeeri musulmanları diniy idaresiniñ diniy-maarif leyhasıdır.
“Faydalı ilim” leyhasınıñ ocaları mektepten evelki ve mektep çağındaki balalar içün İslâm dinini ögreten usuliy qullanmalarını işlep çıqara, qadınlar, erkekler ve balalar içün til kursları çalışa. Bundan da ğayrı, leyha çerçivesinde 8-16 yaşlı balalar içün “Altın nesil” intellektual klubı, küçük musulmanlar içün “Yañı baar” mektebi açıldı, “Emanet” vokal studiyası faaliyet köstere, diniy mevzuda farqlı tedbirler, viktorinalar ötkerile.
“Faydalı ilim” leyhasında 100-den ziyade qadın din ocası çalışmaqta. İyünniñ 21-nde forum çerçivesinde iştirakçiler aile quruluvı, qoranta munasebetleriniñ qaviyleşmesi ve eyileşmesine tesir etken faktorlar, yaş nesilniñ terbiyelenüvi, qoranta munasebetlerinde musulman qadınınıñ rolü ve ömür arqadaşlarınıñ vazifeleri muzakere etildi.
QMDİ matbuat hızmeti
