Qırım Müftisiniñ muavini Esadullah Bairov Çelâbinsk vilâyetiniñ Troitsk şeerinde olıp keçken “Rasulev oquvları: İslâm – Rusiyeniñ tarihı ve zemaneviy yaşayışında” VII Bütünrusiye ilmiy-ameliy konferentsiyasında iştirak etti. Forumda Rusiyeniñ Baş Müftisi Talgat Tacuddin ve Amman İslâm ilimleri halqara universitetiniñ professorı, Muhammed Peyğamberniñ neslinden Abdurrazzak Assaidi (İordaniya) iştirak etti.
Olar ğayrıdan tiklenilgen “Rasuliya” medresesiniñ açıluvı merasiminde iştirak etti. Konferentsiyanıñ mevzusı – “Vaqıt bar ve biz sağ olğance, insanlarğa yahşılıq ve hayır yapmalımız”, dep adlandırıldı. Bugün akimiyet vekilleri ve yerli musulmanlar arasında işbirlik alıp barıla. İslâm cemiyetiniñ temelini cenübiy Ural topraqlarından çıqqan tatarlar, başqırlar, qazahlar teşkil ete. İşbirlik, havfsızlıq ve terrorizm ile küreş sualleri – maruzalarnıñ esas mevzusı oldı. Bu sene “Rasulev oquvları” halqara ilmiy-ameliy konferentsiya statusını aldı. Tedbirde Yaqın Şarq, Merkeziy Asiya, SNG ve Rusiye regionlarından kelgen musafirler iştirak etti.
QMDİ matbuat hızmeti (lentachel malümatları boyunca)
