Qırım Cumhuriyeti ve Sevastopol şeeri musulmanları diniy idaresinde Qırım Müftisi hacı Emirali Ablayevniñ Aqmescit şeeri memuriyetiniñ başlığı Yelena Protsenko ile körüşti. Körüşüv devamında taraflar diniy binalarnıñ diniy teşkilâtlarına qaytarıluv meselesini muzakere ettiler. Al-ı azırda Aqmescitte İslâmnıñ medeniy-tarihiy mirasınıñ abideleri olıp, devlet programmaları çerçivesinde ğayrıdan tiklenüv ve tamirlevge muhtac olğan obyektler bar.
Körüşüv neticesinde taraflar diniy obyektlerniñ QMDİ-ne qaytarılması meselesinde peyda olması ihtimal müşküllerniñ çezilmesinde işbirlik ve yaş nesilniñ maneviy-ahlâqiy yetiştirilmesiniñ ilerilemesine yönelik yañı fikirler ve leyihalar perspektivası saasında işbirlik añlaşmasını imzaladılar.
Körüşüvniñ soñunda taraflar qurulğan yapıcı dialog ve bir-birine yardım köstermek azırlığını qayd etip, qarşılıqlı teşekkür bildirdiler.
QMDİ matbuat hızmeti
