Qırım Cumhuriyeti ve Sevastopol şeeri Müftisi hacı Emirali Ablayev yazıcı, jurnalist Gülnara İlyasova tarafından azırlanğan “Bessmertnı vaşi imena” (“Adlarıñız ebediy yaşaycaq”) kitabınıñ tantanalı taqdim merasiminde iştirak etti.Tantanalı tedbir İ.Ya.Franko adına Qırım cumhuriy universal kitaphanesinde olıp keçti.
Bundan da ğayrı, tedbirde QC İçki işler nazirliginiñ imic siyaseti, malümat ve bağ idaresiniñ başlığı Ruslan Abdureşitov, Qırım Parlamenti Reisiniñ mesleatçısı Ayder Ablâtipov, Qırım yaşlar siyaseti devlet komitetiniñ başlığı Sergey Selimov, “Rusiye birligi” regionlarara cemaat teşkilâtınıñ başlığı Yelena Aksönova, Milletlerara munasebetler boyunca devlet komitetiniñ ve QC Medeniyet nazirliginiñ temsilcileri, “Altın Maydan” leyhasınıñ müellifi ve rehberi, “Tatarstan Cumhuriyeti” gazetasınıñ mahsus korrespondenti Gamira Gadelşina, Rusiye yazıcılar birliginiñ azası, Adıgeya Cumhuriyetinde nam qazanğan artist Adam Açmiz iştirak ettiler.
Qırım Müftisi hacı Emirali Ablayev çıqışında çoqmilletli yarımadada yaşağan halqlarnı birleştirgen Ulu Vatan cenki aqqında kitaplarnıñ derc etilüviniñ müimligini ayrıca qayd etti.
“Biz tarihımıznı bilmek kerekmiz, aydın kelecegimiz içün qaramanane keçmişimizni hatırlamalımız. Millionlarca qurbanlarınen tarihiy aqiqat ne qadar acı olsa da, biz baba-dedelerimizniñ cesürliginden ibret almalımız. Ve bu cesürlikni balalarımız ve torunlarımızğa aşılamaq kerekmiz. Devletimizde neşir etilgen kitaplar milletlerni birleştirmek, birdemlik duyğusını şekillendirmek kerek, halqlarara munasebetlerge kin ve nefretni soqmamaq kerek. Ancaq cumhuriyetimizde yaşağan farqlı milletlerniñ dostluğı, bir-birine olğan sevgisi ülkemizniñ kerçekten inkişaf etmesini temin ete bile”, – dep, qayd etti hacı Emirali Ablayev. Buña ilâve olaraq, Müfti efendi kitap müellifine tarihnıñ saqlanılmasına salmaqlı issesini qoşqanı içün teşekkür bildirdi.
“Bessmertnı vaşi imena” (“Adlarıñız ebediy yaşaycaq”) kitabı 2020 senesi Qırım Cumhuriyetiniñ İçki siyaset, malümat ve bağ nazirliginiñ destegi ile derc etilip, Ulu Vatan cenkiniñ 75-yıllığına bağışlanğan. Kitapta Ulu Vatan cenkinde Bağçasaray şeeri ve Bağçasaray rayonında olıp keçken müim vaqialar aqqında tarihiy malümat berile.
Neşirde cenk iştirakçileri, partizanlar aqqında biografik malümatlar ve olarnıñ hatıraları, Bağçasaray şeeri ve rayonıdaki abideler ve ve hatıra yerleri aqqında malümat toplanğan.
Mezkür cıyıntıqnıñ müellifi Gülnara İlyasova tarif etkenine köre, malümat bir yıl devamında Bağçasarayda neşir etilgen “Slava trudu” (“Emekke şeref”) gazetasınıñ, Bağçasaray rayonı ve şeerindeki oquv yurtları yanında açılğan cenk ve partizan areketine bağışlanğan müzeylerniñ ve şeer ile rayon sakinleriniñ, cenk iştirakçileri soy-sopunıñ hatıralarına ve arhivleriniñ malümatlarına esaslanıp, toplanıldı.
Qırım MDİ matbuat hızmeti
