Qırım Müftisi hacı Emirali Ablayev Qarasuvbazar rayonınıñ Baqsan (Mejgorye) köyünde alman faşist basqıncıları tarafından öldürilgen semetdeşlerimizniñ hatırasını añdı. Mında partizanlarğa yardım etip, qatl etilgen yaşlarğa abide qoyulğan edi.
Müfti Baqsan köyüniñ imamı Ayder Ğaziyevnen elâk olğanlarnıñ hatırasına dua oqudı.
“Bu tarihımızda facialı bir kün, bütün milletlerniñ tarihında qara saifedir. Bugün biz barışıqlıq dünyadasında yaşamamız içün can bergen insanlar içün dualarımız ve hatıramız pek müim. Allah rahmet eylesin”, – dedi Müftisi efendi.
1943 senesi, noyabr 20 künü köyniñ yedi ösmüri faşistler tarafından yaqılıp öldürildi. Olarnıñ hatırasına yerli sakinler hatıra abidesini qoyıp, üstüne elâk olğan oğlanlarnıñ adlarını yazdılar – Subhi, İzzet, Seytlüman, Lüman, Qaybulla, Seytumer, Seytmemet.
Köyde eskiden yaşağan sakinlerniñ sözlerine köre, partizanlarğa yardım etilgeni içün köydeki eali topekün yoq etilecek edi, amma şu yedi ösmür öz ayatlarını feda etip, semetdeşlerini qurtardılar.
Er yıl faşist Almaniyanıñ Sovetler Birligine ücüm etkeni kün – iyünniñ 22-sinde ve mayıs 9 künü, Ğalebe künü, yerli sakinler abideniñ yanına kelip, elâk olğanlarnıñ hatırasına dualar oquylar.
Qırım MDİ matbuat hızmeti
