Qırım Müftisi hacı Emirali Ablayev Qırım paytahtında keçirilgen, 1941-1945 ss. Ulu Vatan cenkinde ğalebeniñ 77-yıllığına bağışlanğan Ğalebe Paradında iştirak etti. Paraddan evel Sovet halqınıñ 1941-1945 ss. Ulu Vatan cenkinde ğalebege bağışlanıp, Mokvada, Qızıl meydanda keçirilgen Ğalebe Paradından Rusiye Federatsiyası Prezidentiniñ Rusiye ealisine Ğalebe künü munasebeti ile muracaatı canlı yayında kösterildi.
Qırım musulmanlarınıñ diniy yetekçisi hacı Emirali Ablayevniñ fikirine köre, Ğalebe künü – devlet tarihında ayrı yerni tuta. “Bu kün baba-dedelerimizniñ sebatı ve qaramanlığını temsil ete. Yaş nesil faşizmnen küreşken ve bu uruşlarda can bergen azat etici arbiylerden örnek almaq kerek”, – dep, qayd etti Müfti efendi.
Qırım paytahtınıñ merkeziy soqağından Qırım kadet korpusı davulcılar rotasınıñ, 126-ncı deñiz yalısı ayrı mudafaa gvardiya brigadasınıñ, 127-nci ayrı istihbarat brigadasınıñ, 1096-ncı zenit raketa polkunıñ, 83-nci müendis-sapör batalyonınıñ ve 22-nci arbiy bölüginden 224-nci ayrı idare batalyonınıñ parad bölükleri tantanalı marşnen keçti. Bundan da ğayrı, paradda Qırım Cumhuriyetiniñ Fevqulade allar nazirliginiñ, Milliy gvardiya orduları federal hızmetiniñ ayrı mahsus motorlı batalyonınıñ, Rusiye İçki işler nazirligi yanındaki Krasnodar universitetiniñ Qırım filialı kursantlarınıñ, V. İ. Vernadskiy adına Qırım federal universitetiniñ arbiy-oqutuv merkezi kursantlarınıñ, genç arbiyler ve kadetlerniñ parad bölükleri iştirak etti. Paradnı Aqmescit garnizonından arbiy tehnika kolonnası yekünledi.
Paradta arbiy ve mahsus tehnika numayış etildi: BTR-80 bronetransportörları, KamAZ OPK-32 avtomobilleri, UAZ-469 istihbarat-himiya maşinası, KamAZ-419L1 bağ ordularınıñ stantsiyası, SKO-10 suv temizlevi kompleks sisteması ile KamAZ avtomobili, arbiy politsiyağa ait UAZ “Patriot” avtomobili. Top sistemaları 2B-26 “GRAD” reaktiv toplu ateş sisteması, 122 millimetrlik D-30 gaubitsaları ve 120 millimetrlik 2B12 modifikatsiyalı “SANİ” minomötlarınen temsil etildi.
Qırım MDİ matbuat hızmeti