Aqmescitniñ Seyit Settar diniy külliyesinde “Halq medresesiniñ” talebelerine tantanalı müitte diplomlar taqdim etildi.
İmamlar mektebiniñ talebelerine diplomlarnı Qırım Müftisi hacı Emirali Ablayev berdi.
Qırımnıñ farqlı köşelerinde yaşağan, çeşit yaşta olğan 35 imam bir yarım yıl devamında İslâm temellerini ögrendiler.
Olardan on kişi artıq imam ve imam yardımcısı olaraq çalışa, yaşağan yerleriniñ camilerinde cuma ve vaqıt namazlarını keçireler.
“Halq medresesiniñ” ocalar taqımı – Qırım Cumhuriyeti ve Sevastopol şeeri musulmanları diniy idaresiniñ hadimleri olıp, fıqıh boyunca magistrler, arap, türk ve qırımtatar tillleri boyunca filologlardır.
Qırım Müftisi hacı Emirali Ablayev kurs talebelerini hayırladı ve alğan bilgileriniñ amelde qullanılmaq kerekligini ayrıca qayd etti.
“Alınğan bilgiler ömürge keçirilmese, faydasız qalır. İnşallah, sizni büyük iş ve milletimiz, dindaşlarımız ve vatandaşlarımız içün büyük mesüliet bekley. Bilgileriñizni faal şekilde qullanıñız ve işiñiz İslâm içün, halqımıznıñ kelecegi içün faydalı olsun”, – dedi Qırım Müftisi.
“Halq medresesiniñ” diplomları mezunlarğa imam olaraq çalışmaq ve diniy faaliyetni alıp barmaq aqqını bere.
QMDİ matbuat hızmeti
