Qırım Müftisi Keñ Toğay köyü din cemiyeti reisiniñ yaqınlarına taziye bildire

Qırım Cumhuriyeti ve Sevastopol şeeri musulmanları diniy idaresi
(Tavriya Müftiyatı) Qarasuvbazar rayonındaki Keñ Toğay (Litvinenkovo)
köyü din cemiyetiniñ reisi Patel Midatnıñ qorantasına ve yaqınlarına
içten taziyesini bildire.
"Biz Midat ağanı Allah yolunda eyilikler yapmağa tırışqan
namuslı ve fedakâr bir insan olaraq bile edik. O, Keñ Toğay köyünde
caminiñ qurulmasına büyük isse qoştı, hayriye aktsiyalarında ve diger
eyi işlerde faal iştirak ete edi.
Qorantası, tuvğanları ve yaqınlarına içten taziye bildiremiz. Bu
acını yaşamaq içün olarğa Allahtan küç ve sabır tileymiz", – dedi Qırım
Müftisi hacı Emirali Ablayev.
"Şübesiz, biz Allah içünmiz, ve, şübesiz, Oña qaytacaqmız"
("Baqara" suresi, 2/156).
Allah rahmet eylesin!