Qırım Müftisi hacı Emirali Ablayev Sinay yarımadasınıñ şimalinde yerleşken El-Ariş şeeri civarında yerleşken camide olıp keçken terakt sebebinden Mısır milleti, elâk olğanlarnıñ qorantalarına taziyelerini bildirdi. Qırım musulmanları adından Mısırdaki terakt neticesinde elâk olğanlarnıñ qorantalarına teren ve samimiy taziyelerimizni bildiremiz. Qırım musulmanları bu kibi terroristik areketni takbih eteler. Qabaatsız insannı öldürmek – büyük günadır. Qoranda deñile ki, qabaatsız insannı öldürgen sanki bütün insanlıqnı öldürgen kibi ola. Eger insan Allahnıñ yasaqlarına baqmadan, adamnı öldürse, demek, o öz yaramay fikirlerine dayanıp er bir adamnı öldüre bile. Onıñ içün bu güna bütün insaniyetlikniñ öldürülmesine teñleştirile. Qazağa oğrağan bütün adamlarnıñ qorantalarına taziyelerimizni bildiremiz ve olarnen beraber keder içindemiz. Bu kibi teratklernen küreşmek içün bütün dünya birleşmek kerek. Qoranda qazalar, ölümlerge ketirgen duşmanlıqnı dağıtqanları tenbih etile: “Allah ve Onıñ Peyğamberinen küreşkenleri dünyada duşmanlıqnı saçmağa tırışalar…” (Maide suresi, 5/33). Terroristler cuma namazı vaqıtında camige kirip, patlayıcı maddeni attılar, camiden çıqmağa tırışqanlarına ise ateş açtılar. Atta yaralanğanlarğa yardım köstermege tırışqan acele yardım maşinalarına da ateş açıldı. Mısır prezidenti vaziyetni ögrenmek içün bütün nazirliklerni topladı. Havssızlıq küçleri patlav yüz bergen yerniñ civarında cinayetçini qıdırmaqtalar.
QMDİ MDT matbuat hızmeti