Qırım Müftisi hacı Emirali Ablayev Qırım Cumhuriyeti ve Sevastopol şeeri musulmanları diniy idaresi ve şahsen öz adından Qırım musulmanlarını hicriy taqvimi boyunca yañı 1442 yılnen hayırladı.
Aziz vatandaşlar, ürmetli dindaşlar!
Muharrem ayınıñ birinci künü 2020 senesi avgustnıñ 20-sine tüşe.
Muharrem ayı Recep, Zul-qade ve Zul-hicce aylarınen bir sırada dinimizce cenkler ve çatışmalar yasaq olğan müteber haram aylarnıñ içine kirmekte.
Bu aylarnı Allahqa ibadet ile keçirmege, nefisnen küreşmege, daa ziyade eyi işler yapmağa ve oraza tutmağa tırışmaq kerek.
İmam Müslimniñ hadisler cıyıntığında nevbetteki hadis rivayet etilmekte: “Ramazandan soñ eñ hayırlı oraza – Allahnıñ ayı olğan Muharrem ayındadır”.
Yañı yılda Qırım musulmanlarına Allahtan merhamet ve bereket isteymiz. Allah ibadetlerimizni qabul etsin ve bizni eki dünyada bahtlı etsin! Amin.
Qırım Müftisi
Hacı Emirali Ablayev