Qırım Müftisi hacı Emirali Ablayev F. Yakubov adına Qırım Devlet müendislik-pedagogika universiteti ve V.İ. Vernadskiy adına Qırım Federal universitetiniñ alimleri İsmail Kerimov, Refiq Qurtseitov, Natalya Yablonovskaya, Zarema Hayredinova ve Bağçasaray tarihiy-medeniy ve arheologik qoruq müzeyi erkânındaki İsmail Gasprinskiyniñ yadigârlıq müzeyiniñ rehberi Elmira Abibullayeva ile körüşti.
Qırım Müftisi alimlerge aprel 7-9 künleri Aqyarda olıp keçken “Pandemiya zamanında Rusiye musulmanları diniy idareleri: içtimaiy hızmetniñ yañı usulları” halqara ilmiy-ameliy konferentsiyasında faal iştirak etüvleri içün teşekkür bildirdi. Körüşüv devamında taraflar keçirilgen konferentsiyanıñ müimligini, umumiy leyhalarnı, yaş ziyalılarnıñ maarif, medeniyet ve diniy leyhalarnıñ işlep çıqılması ve ömürge keçirilmesi işine celp etilüvini muzakere ettiler.
Qırım Cumhuriyeti ve Sevastopol şeeri musulmanları diniy idaresiniñ leyhalarına qol tutqanları içün minnetdarlıq olaraq Qırım Müftisi er bir musafirge kümüşten yapılğan “İSMAİL GASPRİNSKİY” hatıra aqçasını ediye etti.
Qırım MDİ matbuat hızmeti
