Qırım Müftisi hacı Emirali Ablayev Qırım Cumhuriyetiniñ Saq rayon memuriyetiniñ başlığı Mihail Slobodânik, Saq rayon şurasınıñ reisi Vladislav Haciyev, Saq şeeriniñ yolbaşçıları Aleksandr Övdiyenko ve Yelena Minakovanen iş muşaveresinde iştirak etti. Muşaverede Qırım Cumhuriyetiniñ milletlerara munasebetler boyunca devlet komitetiniñ başlığı Ayder Tippa, Saq rayonınıñ baş imamı Mesfer Settarov, Saq rayonı musulman din cemiyetleriniñ reisi Seitasan Asanov ve Kezlev bölgesiniñ baş imamı Eskender Memetov iştirak ettiler.
Tögerek masanıñ iştirakçileri ayrı diqqatnı köy memuriyetleri başlıqlarınıñ işine ve musulmanlarnıñ ibadeti içün ayrı mekânlar olmağan er bir meskün yerde böyle mekânlarnıñ teşkil etilmesine ayırdılar.
Rayon memuriyeti Saq rayonınıñ Bağay (Suvorovskoye), Lesnovka, Qart Biy (Ştormovoye) köy şuralarınıñ saasında cami arsalarınıñ resmiyleştirilmesi ceryanını nezareti astına aldı.
Qırım Müftisi şeer ve rayon memuriyetlerine yapıcı dialog ve işbirlikleri içün teşekkürler bildirdi.
“Bugün bizim umumiy maqsadımız – yaş nesilge maneviy ahlâqiy qıymetlerni aşılamaqtır”, – dep, qayd etti Qırım Müftisi.
Muşavereniñ soñunda Qırım Müftisi Qırım Cumhuriyeti ve Sevastopol şeeri musulmanları diniy idaresi adından Saq rayonında dinlerara ve milletlerara munasebetlerniñ ilerilemesi ve pekitilmesine, milliy ve diniy medeniyetlerniñ saqlanıluvına berilgen emekler içün teşekkürnameler taqdim etti.
Qırım MDİ matbuat hızmeti
