Qırım Müftisi Qırımdaki bulğar, yunan ve ermeni halqlarına Qırımdan zorbalıqnen sürgün etilmeleriniñ 77-yıllığı munasebetinen taziye bildirdi.
Bu vaqia Qırım halqları tarihında eñ facialı saifelerden biridir. 77 yıl evelsi yunanlar, bulğarlar, ermenilerniñ sürgüni başlatıldı, sürgünlikte olar çoq yıllar zorluqlar ve Vatan asretini çektiler.
Qırımtatarlarğa sürgün etilgen halqlarnıñ acısı çoq yaqındır. Yunan, bulğar, ermeni ve diger sürgün etilgenlerge, olarnıñ yaqınları ve soylarına taziye bildirem, ebediyen yat yerlerde qalğanlar ise, daima hatıramızda.
Bugün Qırım halqları tuvğan tillerini, medeniyetlerini ve urf-adetlerini saqlap, amanlıq içinde er saada inkişaf eteler. Cumhuriyetimizniñ bütün sakinlerine barışıqlıq, bereket, baht ve sağlıq tileyim!
1944 sene, iyunniñ 24-yu – bir çoq halqnıñ tarihında qara saifedir. Bu künde Qırımdan ermeniler, bulğarlar ve yunanlar sürgün etilmege başladı. Bu munasebet ile Qırımda matem tedbirleri keçirile.
Qırım MDİ matbuat hızmeti