Qırım Müftisi vatandaşlıq mesülietini kösterip, koronavirus infektsiyasınıñ darqalmaması içün kerekli tedbirlerni almağa çağırdı.
Ürmetli dindaşlar, qıymetli vatandaşlar. Vaziyet köstere ki, qarşımızda insanlarnıñ ömürlerini alğan koronavirus infektsiyasınıñ suratnen yayılması büyük havfı turmaqta.
Qıymetli musulmanlar, sizge kendiñizniñ ve yaqınlarıñıznıñ sağlıqlarını qorçalamañız ricasınen bulunam. Dinimiz bizden em bir insannıñ, em de bütün cemiyetniñ sağlığını qorçalamaqnı talap ete. Bugün er birimizniñ üstünde mesüliet bar. Quranda: “Öz-özüñizni havf astında qaldırmañız”, – dep buyurıla! (“Baqara” suresi, 2/195 ayet).
Havfsızlıq tedbirlerini almağa unutmañız. Musulmanlarğa lâyıq şekilde şahsiy temizlik qaidelerine riayet etiñiz, insanlar toplu olğan yerlerge qoşulmañız ve, imkânıñızğa köre, mümkün olğanı qadar, qatnamalarıñıznı sıñırlamağa tırışıñız.
İmkânıñızğa köre, qalabalıq toylarnı ve kütleviy tedbirlerni başqa vaqıtqa keçiriñiz, cenazeniñ vaqıtını sıñırlanıñız, cenazede bulunıp, havfsızlıq mesafesi qaidesine riayet etiñiz.
Camige azırlanğanda, öz namazlıqlarıñıznı alıñız. Cuma namazı vaqıtında mıtlaqa arañızda bir yarım metr mesafe olmalı.
Hastalıq alâmetlerini, alsızlıq duysañız, hastalıq darqaluvınıñ sebepçisi olmamaq içün, lütfen, camige kelmeñiz. Hastalıq alâmetlerini duysañız, mıtlaqa ekimge muracaat etiñiz, öz başıñızğa tedaviylenüvnen oğraşmañız!
Allahqa dua etip, bizni belâlardan saqlamasını, qaza-belâlarğa oğrağanlarğa yardımcı olmasını, hastalıq sebebinden bu dünyanı terk etkenleriniñ canına rahmet etmesini tileymiz. Dua – soñsuz-tükenmez küç menbamızdır!