Qırım Müftisiniñ Qırım Cumhuriyeti ve Sevastopol şeerinde ÜFSİN ile işbirlik boyunca yardımcısı, Aqmescit şeeriniñ baş imamı Muhammed İslamov yardımcısı İbraim Zinetdinov ile Aqmescitniñ №1 koloniyasını ziyaret etip, anda bulunğan dindaşlarımıznı Qurban bayramınen hayırladı. “Biz dua oqudıq, balalarnı Qırım musulmanlarınıñ diniy yetekçisi hacı Emirali Ablayev adından hayırladıq. Olarğa sağlıq-selâmetlik, tez vaqıtta azat olmalarını tiledik ve tatlılıqlar ikram ettik”, – dedi Muhammed İslamov.
Körüşüv devamında Muhammed İslamov ve İbraim Zinetdinov bayramnıñ tarihı ve onıñ emiyeti aqqında tarif ettiler. “Men Qırım Cumhuriyeti ve Sevastopol şeeri musulmanları diniy idaresiniñ işi aqqında tarif ettim. Qırım Müftiyatınıñ maarif faaliyetiniñ örnegi – menim koloniyağa ziyaretimdir. Balalar suhbetke qoşula ediler, olarnı meraqlandırğan suallerni berdiler”, – dep, qayd etti Müfti yardımcısı.
QMDİ matbuat hızmeti