Qırımdan Mekkege barıp kelgen 35 vatandaşımız Vatanğa qayttı. Bu hacılarımıznıñ birinci gruppası edi. Aqmescitniñ avalimanında müsülmanlarnı Qırım Müftisiniñ muavini Esadullah Bairov, Müftiyat hadimleri, AVN-tur şirketiniñ vekilleri qarşıladılar. Vatandaşlarımız tahminen 4 afta devamında dünyanıñ çeşit köşelerinden teşrif buyurğan müsülmanlarnen beraber Hacılıq ibadetini yerine ketirdiler, Mekke ve Medineniñ tarihiy ve muqaddes yerlerini ziyaret ettiler. Qırım Müftisiniñ muavini Esadullah Bairov dindaşlarnı hayırladı.
“Quvançımız sıñırsızdır, hacılarımıznı qarşılaymız. Elhamdualillâh, er kes sağ-selâmet Vatanına qayttı. Muqaddes yerlerde yapqan dualarnı Allah qabul esin”, – dedi Esadullah Bairov.
Hacılar er şeyden memnün qaldılar. Qırım Müftisiniñ muavini Ayder İsmailov bu yıl Hacılıqqa bardı. Onıñ aytqanına köre, qırımlılar biri-birine yardım etip, yüksek seviyeli medeniyetni, terbiye kösterdiler.
“Er şey yahşı keçti, çünki biz Allah rizası içün ibadet ettik. Arzumız yerine keldi, qalğanı müim degil. Allah cümle müsülmanlarnıñ, em de Qırım müsülmanlarınıñ dualarını qabul etsin”, – dedi Ayder İsmailov.
Bu yıl Qırımdan 370 müsülman Hacılıqqa bardı.
QMDİ MDT matbuat hızmeti
