Aqmescitte Qırım ve Sevastopol MDİ Şurasınıñ toplaşuvı olıp keçti. Şura terkibinde QMDİ-ne kirgen yerli müsulman din cemiyetlerniñ temsilcileri kire. Şura toplaşuvı çerçivesinde Qırım müsulmanlarınıñ VI Qurultayınıñ keçirilmesi suali muzakere etildi. Hususan, VI Qırım müsulmanları Qurultayı delegatlarınıñ saylanuvı ve VI Qurultay keçirilüviniñ Teşkiliy komiteti aqqında Nizamname baqıldı.
VI müsulmanlar Qurultayı delegatlarınıñ saylanuvı aqqında Nizamnamede yerli müsulman diniy teşkilâtlarğa 2018 senesine qadar sentâbr 4 künü teşkilât azalarınıñ umumiy toplaşuvlarında saylanğan ve VI müsulmanlar Qurultayınıñ teşkiliy komitetiniñ protokollarında tasdıqlanğan rayon ve köylerden delegatlarnıñ cedvelini taqdim etmek kerektir.
Qayd olunuv basamağında olğan din cemiyetleri mesken yerlerde diniy merasimlerni keçirgen imam ya da mollanı yollay bileler. Böylece, Qırım müsulmanları Diniy idaresiniñ Şurası tarafından VI Qırım müsulmanları Qurultayınıñ keçirilüv tarihı olaraq 2018 senesi oktâbrniñ – 27 esabat-saylav künü olaraq bir rey ile tayin etildi. VI Qırım müsulmanları Qurultayında qırımtatar diasporalarınıñ vekilleri de iştirak etecek.
QMDİ matbuat hızmeti
