Qırım ve Aqyar musulmanları diniy idaresinde QMDİ Şurasınıñ toplaşuvı ötkerildi. Tedbir çerçivesinde Bütün Qırım musulmanları Qurultayınıñ, Qırım, Lehistan, Poloniya ve Aqrusiye musulmanlarınıñ Müftisi olaraq Noman Çelebicihannıñ seçilmesi ve qırımtatar halqı Birinci Qurultayınıñ keçirilmesiniñ 100-yıllığına bağışlanğan tedbirlerniñ keçirilmesi muzakere etildi.
Alınğan qararlarğa binayen, dekabrniñ başında Qırımda tarihiy vaqialarğa bağışlanğan bir sıra tedbirler ötkerilecek.
Hususan, qırımtatar halqınıñ Birinci Qurultayı ve Noman Çelebicihanğa bağışlanğan sergi ötkerilecek. Sergi Qırım musulmanları diniy idaresi ve qırımtatar tarihiy-medeniy miras müzeyi tarafından azırlanıla.
Tedbirler çerçivesinde “tögerek masalar”, “Millet” telekanalı ve “Vetan sedası” radiosında programmalar ve Bağçasaraydaki Hanlar sarayında ekskursiyalarnıñ ötkerilmesi köz tutula.
QMDİ MDT matbuat hızmeti
