Fevzi Yaqubov adına Qırım müendislik ve pedagogika universitetinde “Qırımtatarlarnıñ tarihı. 3-ünci cılt. Qırım hanlığı (XV-XVIII asırlar” neşiriniñ prezentatsiyası olıp keçti. Qırım Cumhuriyeti ve Sevastopol şeeri Müftisi Hacı Emirali Ablayevniñ adından musafirlerni onıñ muavini Ayder İsmailov selâmladı. “Qırım Müftiligi alimlerimizniñ tarihiy işleri boyunca teşebbüslerine daima qol tuta. Siziñ ağır, lâkin müim işiñiz içün teşekkür bildirem. Biz vatanğa qaytqanımız vaqıttan berli öz alimlerimiz öz halqımıznıñ tarihını yazğanını arzulay edik. Ümüt etem ki, şu qıymetli neşirniñ diger cıltları da eñ yaqın vaqıtta dünya yüzüni körecek ve ilmiy tedqiqatlarnıñ temeli olur”, – dep, qayd etti Ayder İsmailov.
Kitapnıñ taqdiminde Fevzi Yaqubov adına Qırım müendislik ve pedagogika universitetiniñ rektorı Çingiz Yaqubov, Tatarstan Cumhuriyeti İlimler akademiyasınıñ Ş. Marcani adına Tarih institutınıñ müdiri Radik Salihov çıqışta bulundılar. Kitap üzerindeki iş aqqında tarih ilimleri doktorı, Rusiye ilimler akademiyasınıñ professorı, Rusiye halqlarınıñ sanatı devlet müzeyiniñ baş müdiriniñ muavini, cıltnıñ mesül muarriri İlya Zaytsev, TC İA Ş. Marcani adına Tarih institutınıñ Qırım ilmiy merkeziniñ rehberi, cıltnıñ mesül kâtibi Eldar Seydametov, QMPU tarih kafedrasınıñ rehberi, cıltnıñ mesül kâtibi Emil Seydaliyev, içtimaiy gumanitar ilimler kafedrasınıñ rehberi, dotsent, içtimaiyat ilimleri namzeti Refiq Qurtseitov çıqışta bulundılar.
İhtar. 2021 senesi TC İA Ş. Marcani adına Tarih institutı erkânındaki Qırım ilmiy merkeziniñ çalışmasınen “Qırımtatarlarnıñ tarihı, beş cılt içinde. III cılt. Qırım hanlığı (XV–XVIII vv.)” ilmiy monografiyanı azırladı. Kitap üzerinde iş eki yıldan ziyade devam etti. Yazı, arheologiya, harita, tasviriy menbalardan elde etilgen malümatlarnıñ er taraflı tahlili esasında müellifler eyeti XV–XVIII asırda, – Qırım hanlığı devirinde, – qırımtatarlar tarihınıñ esas basamaqlarınıñ obyektiv rekonstruktsiyasını yapmağa tırıştılar.
Neşirniñ müellifleri arasında Qırım hanlığı tarihınıñ farqlı saalarında tedqiqatlarınen belli olğan ve em Rusiyeniñ, em de bir sıra çetel memleketlerniñ, şu cümleden, Aqrusiye, AQŞ, Romaniya, Türkiye ve Ukrainanıñ eñ büyük ilim müessiselerini temsil etken mütehassıslar mevcuttır. Kitapta orta asırlardaki qırımtatar devletiniñ tarihı obyektiv şekilde açıqlana ve ileride çalışmaq içün qırımtatar tarihınıñ şu deviri boyunca perspektiv tedqiqat yönelişleri kösterile.
Kitapta Qırım hanlığınıñ siyasiy, içtimaiy, iqtisadiy ve medeniy tarihı boyunca malümat taqdim etile. Devletniñ tış siyaseti, arbiy nizamı, idare sisteması, uquqiy aspektleri, sanatı, mimarcılığı, zenaatları ve köy hocalığı, ilimi, tahsili ve bir çoq daa diger mevzular açıqlana. Neşir em mütehassıslar (tarihçılar, arheologlar, sanatşınaslar), em de qırımtatar ve Qırım hanlığınıñ tarihınen meraqlanğan er kesge meraqlı olur.
Qırım MDİ matbuat hızmeti