Qırım Cumhuriyeti ve Sevastopol Müftisi hacı Emirali Ablayev er yıl keçirilgen “İzge Bolgar jıyenı” tedbirinde iştirak etti. Bu künleri Tatarstannıñ Spassk rayonındaki Bolğar qoruq-müzeyinde keçirilgen ananeviy tedbir İtil boyu qadim Bulğarnıñ İslâmnı qabul etmesine bağışlanğan.
Tantanalı tedbirde toplanğanlar ögünde Qırım Müftisi çıqışta bulundı. O, Tatarstan Cumhuriyetiniñ akimiyetine ve din erbaplarına tarihiy tedbirde iştirak etmek imkânını yaratqanları içün teşekkür bildirdi. Bundan da ğayrı, o, qayd etti ki, Rabbimiz bizge bergen er şeyni saqlamaq kerek, ve ibadetnen dua etmek, dinni saqlap tiklemek imkânları içün şükür etmek kerek.
“Yañı camiler qurula, inanğanlarnıñ maneviy ihtiyaclarını yerine ketirmek, milletlerniñ milliy özgünligini saqlamaq içün kerekli şaraitniñ yaratılmasına büyük diqqat ayırıla. Devletniñ müftilikleri, camileri ve medreseleri ananeviy İslâm dininiñ saqlanıluvı, müminlerniñ diniy bilgilerini arttırmaq, olarnıñ tuvğan tilini ögrenip qullanması içün büyük iş yapalar. Ebet, çezilmegen daa çoq mesele bar, er birimizniñ vazifesi – diniy ayatta olğan meselelerniñ çezilüvi içün doğru yol tapmaqtır”, – qayd etti Qırım Müftisi.
Açılış merasiminden soñ iştirakçiler “Kiçik minare ve Hanlar türbesi” saasında dua oqudılar, soñra, vaqıtı kirgen soñ, Rusiye musulmanlarınıñ merkeziy diniy idaresiniñ reisi, Rusiyeniñ aliy Müftisi Talğat Tacudin imamlığında cemaat namazı keçirildi.
Bayramda ananeviy ustalar yarmalığı çalışa. Tedbir programmasında qırımtatarlarnıñ ananeviy “küreş” sport çeşitine beñzegen küreş yarışı keçirile.
İhtar: “İzge Bolgar jıyenı” Bulğarda 1989 senesinden başlap keçirile. Tedbirde Rusiyeniñ farqlı bölgelerinden ve çetelden kelgen musafirler, Tatarstan akimiyeti, diniy idarelerniñ vekilleri, rayonlarnıñ başlıqları, nazirlikler ve çeşit idarelerniñ rehberleri, Rusiye bölgeleriniñ müftileri iştirak ete.
Qırım MDİ matbuat hızmeti
