Qırım Cumhuriyeti ve Sevastopol şeeri musulmanları diniy idaresiniñ (Tavriya Müftiyatınıñ) diniy hadimleri cami cemaatlarınen beraber bütün Qırım boyunca toplu iftarlarnı keçirmege devam eteler.
Aqmescit, Saq, Aqşeyh, Aqmeçit, Bağçasaray, Canköy ve diger rayonlarda iftarlarda 100-den ziyade semetdeşimiz toplana. İftarlarğa er kişiler de, qadınlar da, balalar da kele.
Musulmanlar içün medeniy ve maarif programmalar azırlana. Bundan soñ beraberce teravih namazları qılına.
Toplu iftarlar Ramazan ayı boyunca insanlarnı merhametlikke, ahlâqqa, adaletke, maneviy inkişafqa ve temizlenüvge ıntıluv üzre birleştire, imannıñ qaviyleşmesine, cemiyette qarşılıqlı añlayışnıñ ve çıdamlılıqnıñ pekitilmesine yol aça.
Qırım MDİ matbuat hızmeti