2021 sene, sentâbr 20 künü Rusiye Hacılıq missiyasınıñ pandemiya şaraitinde Rusiye musulmanları içün hac ve umreniñ teşkil etilüvi boyunca muşaveresi olıp keçti. Muşavere onlayn şekilinde olıp keçti.
Onlayn konferentsiyada Rusiye musulmanları diniy idareleriniñ temsilcileri ve hacılıq operatorları, şu cümleden, Qırım Cumhuriyeti ve Sevastopol şeeri musulmanları diniy idaresiniñ AVN-Tur hacılıq operatorınıñ vekili Artur Reşitov iştirak ettiler.
Konferentsiya neticesinde Rusiye hacılıq missiyası tarafından Saudiye Arabistanı Memleketinde Rusiye aşıları resmiy şekilde qabul etilmegeni sebebinden RF vatandaşları içün hac ve umreniñ teşkil etilüvi imkânsız olğanını bildirgen kömmünike qabul etildi.
Konferentsiya iştirakçileri diniy ve ticariy strukturalarınıñ, şu cümleden, hacılıq meselelerini regulâtsiya etken şahıslarnıñ diqqatını ağımki zamanda hacılıqqa baracaq taqımlarnıñ çıqışlarını teşkil etüv ıntıluvları RF Hacılıq Şurası ve diger munasip teşkilâtlar tarafından qattı şekilde nezaret etecegine çekti.
Bundan da ğayrı, Memleketniñ sıñırlarını keçmek içün çetel aşılarnen aşılanuv boyunca sahte vesiqalarnı tapşıruv ıntıluvları da qatiyen izlenecek.
Rusiye hacılıq missiyası hacılıqnı teşkil etken bütün şirketlerni Rusiye Federatsiyasınıñ qanunlarını bozmamağa çağıra.
Buña ilâve olaraq, Rusiye hacılıq missiyası hacılıqqa barmağa istegenlerge muracaat etip, şübeli teşkilâtlardan hacılıq yolu biletleriniñ ve çetel aşılarnen aşılanuv vesiqalarınıñ satın alınuvı meselesinde diqqatlı olmalarına çağırdı.
Qırım Müftiligi ve onıñ resmiy hacılıq operatorı AVN-Tur ise, öz nevbetinde, bildire ki, al-ı azırda hacğa ve umrege barmaq içün teşkiliy işler keçirilmey.
Böyle vaziyet Saudiye Arabistanı Memleketi tarafından Rusiye aşıları qabul etilmesine ve musulmanlarnıñ sağlıqları ve mallarına zarar bermeycek şarait teşkil etilmegenine qadar devam etecek.
Qırım MDİ matbuat hızmeti