Qırım musulmanları diniy idaresiniñ hadimleri Aqmescitte, Vorovskiy, 7 adresi boyunca yerleşken Salğır baba azizinde talaqa keçirdi.
Talaqanıñ keçirilmesine şeer memuriyeti destek kösterdi. Bundan da ğayrı, öz yardımlarını Yedinci kün hristian adventistleri kilisesiniñ hızmetçileri teklif ettiler, olarnıñ kilisesi azizniñ yanında yerleşe.
Talaqa iştirakçileri topraqnı temizledi, çöplükni çıqardı, terek ve çalılarnı kestiler. Yazıq ki, ava vaziyeti sebebinden azizde yerleşken çeşmeni temizlemege imkân olmadı.
Talaqada iştirak etken Qırım Müftisiniñ muavini Raim Ğafarov müftiyat hadimlerine, şeer memuriyeti ve Yedinci kün hristian adventistleri kilisesiniñ hızmetçilerine yapqan işleri içün teşekkür bildirdi ve qayd etti ki, musulmanlar içün aziz cuma künü yapılğan hayırlı işler daa da qıymetlidir, em de güzel bir adettir.
Hatırlatamız, Aqmescit şeer akimiyetiniñ 26.11.2020 senesiniñ qararı ile Vorovskiy, 7 adresi boyunca yerleşip, Salğır baba azizi olaraq belli olğan topraq müftiyatımıznıñ mülkiyetine keçirildi. Al-ı azırda tarihçılar taqdim etken tarihiy malümatlarğa esaslanıp, topraqnıñ abadanlaştıruv leyhası boyunca işler alıp barıla.
İHTAR: Salğır baba azizi XVII asırdan başlap, aziz bir yer olaraq bellidir. Rivayetlerge köre, Salğır baba salih ve zahid bir zat olaraq belli olıp, ibadet içün Salğır özeniniñ yalısında yerleşken emenlikke inzivağa çekile edi. Onıñ duasını almaq ve şifa tapmaq içün yanına bir çoq insan kele edi. Aqmescitteki şu tarihiy mekân uzun yıllar devamında harabe alında edi. Ancaq 2020 sene şu topraq, niayet, Qırım musulmanları diniy idaresiniñ mülkiyetine keçirildi.
Qırım MDİ matbuat hızmeti
