Aqmescit şeeriniñ Kebir camisinde birinci toplu iftar olıp keçti. İftarğa Qırım paytahtınıñ er yerinden cemaat toplandı.
“Koronavirusnen bağlı sıñırlanuvlar sebebinden biz eki yıl devamında toplu iftarlarnı keçiremedik. Bugün ise, Allahnıñ yardımınen, bir arada toplanıp, beraberce iftar yaptıq. İnsanlar bu künlerni bekley edi, çünki toplu iftarlarda ayrı iman birligi müiti üküm süre. Ramazan – eyilik zamanıdır”, – dep, qayd etti Kebir caminiñ imamı İsmail Ablayev.
Hatırlatamız, Qırım Cumhuriyeti ve Sevastopol şeeri musulmanları diniy idaresi ananeviy iftarlarnı keçirmege başladı. Mubarek Ramazan ayı devamında iftarlar Aqmescitteki Kebir caminiñ azbarında qoyulğan çadırda keçirilecek. 250 ziyade musulman bir sofra etrafında toplanıp, iftarnı beraber keçire bilecek. İftarlar er kün teşkil etilecek.
QMDİ matbuat hızmeti