Qırım müsulmanları Diniy idaresiniñ “Faydalı ilim” oqutuv-maarif merkezinde oquv yılınıñ soñu qayd etildi. “Yañı baar” diniy-maarif leyhasınıñ talebeleri birinci attestatlarını aldılar. Olarnıñ arasında 3-7 yaşlı balalar.
“Yañı baar” leyhasınıñ ocaları talebelernen birlikte bayram programmasını azırladılar. Balalar mini-spektakllerde iştirak ettiler, Muhammed Peyğamber (s.a.s.) aqqında şiirler oqudılar ve Qurandan surelerni ayttılar!
Muqaddes Kitapnı oqumağa ögrengen talebeler Qırım Müftisi adından bahşiş olaraq Qurannı aldılar. Quran oqumaq ögrengen talebelerniñ eñ küçügi 4 yaşındadır! Bundan da ğayrı, olarğa medaller, fahriy yarlıqlar ve bahşişlar berildi.
Tedbir küçük müsulmanlar içün azırlanğan “küçük iftar”nen yekünlendi!
Hatırlatamız, “Yañı baar” kursları 3-7 yaşlı balalar içün yaz tatilleri devamında da çalışa. Dersler er cumaertesi künü saat 10:00 ötkerilecek. Er künlük oquv yılı ise sentâbrde başlanacaq.
QMDİ matbuat hızmeti
