Qırım müsulmanları Diniy idaresi erkânında faaliyet Qalay İslâm ilimleri medresesiniñ erkekler bölüginde mezunlar bayramı ötkerildi. Medreseniñ tasil programmasını 10 yigit yekünledi. Olar tolu (orta) umumiy tasil aqqında şeadetname ve İslâm derslerini keçirmege aqqını bergen diplomnı aldılar. Programma boyunca mezunlar ilâhilerni icra ettiler ve Qırımnıñ birinci Müftisi Noman Çelebicihannıñ şiirlerini oqudılar.
Bu munasebet ile Mezunlarnı Qırım Müftisiniñ muavini Esadullah Bairov hayırladı. Öz sözlerinde o medreseniñ ğayrıdan tiklenüvi tarihını hatırlattı.
“Bir vaqıtları mında çöller bar edi, amma Qırım müsulmanları Diniy İdaresiniñ ğayreti ile artıq 20 yıl devamında biz İslâm dini ocalarını terbiyeleymiz”, – dep ayttı Esadullah Bairov. Bundan da ğayrı, o, mezunlar ileride milletimizge fayda ketirecegine ümütini bildirdi.
“Ümüt etemiz ki, kelecekte siz ilimlerni ögrenmek ve milletimizge İslâmnı yetiştirmek kibi maqsadlarıñızğa irişecesiñiz”, – dep ayttı o. Qırım Müftisiniñ muavini mezunlarnıñ ana-babalarına sabırları ve balalarına aşlağan maqsadkârlığı içün teşekkürler bildirdi ve ocalarnıñ bu saada büyük işlerini qayd etti.
Mezunlarnı medreseniñ direktorı Emir-Asan Ümerov da hayırladı. Hayırlav sözlerinde o İslâm dini bilgileriniñ müimligini ayrıca qayd etti.
“Diniy temelde maarif – siziñ ömüriñizde birinci ve müim bir adımdır. Diniy bilgiler ve İslâmğa nisbeten ürmet – dünyanıñ ögrenüvinde müim adımıñızdır”, – dep ayttı Emir-Asan Ümerov. Ve qoştı ki, qırımtatar milletiniñ inkişaf devirleri aynı tasilden başlana.
Mezunlar bayramına studentlerniñ ana-babaları, soy-sopları ve dostları qoşuldı.
Kelecekte mezunlarnı Qırım camilerinde bir yıllıq ameliyat bekley, soñra ise olar aliy oquv yurtlarında tasil almaqnı devam etecekler. Mezunlarnıñ sözlerine köre, olar Qırımda yaşamağa ve inkişaf etmege niyetindeler.
QMDİ matbuat hızmeti
