Haberler
Kebir camide birinci iftar olıp keçti (FOTO)
Опубликовано:
Ramazan ayınıñ birinci künü, mayısnıñ 16-sında, Aqmescitniñ merkeziy Kebir camisinde ilk iftar keçirildi. İftarğa 200 insan qoşuldı. Olarnıñ arasında müsulman devletlerinden kelgen Qırım universitetleriniñ studentleri, yerli sakinler ve Aqmescit musafirleridir. Ezan sesi yañğırağan soñ, oraza tutqanlar aqşam namazını qıldılar. Ramazan ayı devamında hayriye iftarlarınıñ Kebir cami ve Qırımnıñ diger camilerinde ötkerilmesi planlaştırıla. Bundan da ğayrı, Qırım müsulmanları Diniy idaresi "Açıq yürekler" göñüllüler teşkilâtı ile birlikte uzaq yerleşken köylerde iftarlarnıñ keçirilmesi kibi leyhanı ömürge keçire. Muqaddes Ramazan ayı mayısnıñ 16-sında başlandı ve iyünniñ 14 qadar devam etecek. Oraza bayramı ise iyünniñ 15, 16 ve 17 künleri qayd etilecek. Ramazan ayı devamında müsulmanlar içün oraza tutmaq farzdır. Olar küneşniñ doğuvından batmasına qadar suv ve aştan vazgeçeler. Orazanı yüklü ve balanı emizdirgen qadınlar, yedi yaşına yetmegen balalar, hasta ve esli başlı adamlar, yolcular tutmaybileler. QMDİ matbuat hızmeti [gallery link="file" columns="4" size="medium" ids="15925,15923,15921,15919,15917,15915,15913,15911,15909,15907,15905,15903,15901"]
Dünya müsulmanları Ramazan orazasını tutıp başladı (shema)
Опубликовано:
Bu sene Ramazan ayı mayıs 16 künü başlandı. Ramazan ayı 30 kün devam etecek. Demek, orazanıñ soñki künü iyünniñ 14 tüşe, Oraza bayramınıñ birinci künü ise – iyünniñ 15-dir. Bu künler Şeriat qaidelerine köre, belgilengendir. Ramazan ayı kökte ay körüngen kününden başlana. Bundan da ğayrı, 1966 senesinden başlap, farqlı konferentsiyalarda, ilmiy forumlar ve kongresslerde defalarca qayd etilgeni kibi, vaqıt farqı esaplanmaycaq. Ramazan dünyanıñ er angi noqtasından ay körüngeninen başlana. Yañı ay mayısnıñ 15 – mayısnıñ 16-sına avuşqan gecesi körügen edi. Birinci olıp onı cenübiy amerikalı qıtasınıñ sakinleri kördi. Olarda ay körüngende, Londrada saat 00:20, Berlinde 01:20, İstambulda 02:30, Mekkede ise saat 02:20 olğandır. Yani bu devletlerniñ müsulmanları Cenübiy Amerikada ay artıq körüngeni aqqında malümatnı suhurdan evel aldılar. Bu ise Oraza mayısnıñ 16-sında başlanğanınıñ köstergiçi oldı. Böyleliknen, bir sıra müsulman devletleri Cenübiy Amerikada ay körüngenini köz ögüne alıp, Orazanı mayısnıñ 16-sından başlap tutmaq kerek ediler. Peyğamberniñ (s.a.s.): "Orazanı ay körüngeninen başlañız, bayramnı ise ay körüngeninen (Şevval ayı) qayd etiñiz" hadisi ve Hakimniñ yollağan hadisine köre, Peyğamber (s.a.s.) sahradan kelgen bedeviyniñ yañı aynı körgeni aqqında sözlerine esaslanıp, orazanıñ başlanğanını ilân etti. Buña esaslanıp, Oraza mayısnıñ 17-sinde başlanğanı aqqında fikirler yañlış ve Qırım müsulmanları arasında fitnelerge yol aça. Müsulmanlar öz regionlarında çalışqan Diniy idareleriniñ qararlarına uymalılar. Diniy idarelerniñ fetva çıqarmaq aqqı bar. Çetelden kelgen anonim telefon ağlarına esaslanmaq mümkün degildir. Bu al müsulmanlarnıñ birligini bozabile. QMDİ matbuat hızmeti
2018 senesi Hacılıq vesiqalarınıñ qabul etilüvi devam ete
Опубликовано:
Qırım ve Sevastopol şeeri müsulmanları Diniy idaresiniñ "AVN-TUR" hacılıq operatorı hacılıqqa barmaq niyetlengenlerniñ vesiqalarını qabul etmekni devam ete. Diqqat! 2018 senesi mayısnıñ 16-sından başlap, Qırım Cumhuriyeti TİN migratsiya sualleri boyunca regional bölüklerinde çetel pasportlarnıñ resmiyleştirilüvi içün, hacılarğa "yeşil koridor" açıldı. Yani muracaat etken insanlarnıñ çetel pasportı ile bağlı olğan işler acele sürette al etilecek. Hacılarnıñ aşlanuvı 2018 senesi iyün 18 – iyül 18 künleri 2-sanlı poliklinikada, Aqmescit şeeri, Lermontov soqağı, 3-a adresi boyunca ötkerilecek. Qırım Müftiligi hacılıqqa barmaq istegenlerine çetel pasportlarını tezce yapmağa ricada buluna. Resmiyleştirilüvniñ soñki künü – 2018 senesi iyülniñ 1-dir. Tavsilâtlı malümat almaq içün Aqmescit şeeri, Çehov soqağı, 20 adresi boyunca ve +7978 0908 202 telefon vastası ile muracaat etmek mümkün. QMDİ matbuat hızmeti
Qara-Quyu köyünde ibadethane açıldı (FOTO)
Опубликовано:
Yedi Quyu rayonınıñ Qara-quyu qasabasında ibadethane açıldı. Köyde 700 qırımtatar qorantası yaşay. Endiden soñ köy müsulmanları ve qomşu köylerniñ sakinleri diniy merasimlerni yañı binada keçire bileler. İbadethane qasabanıñ yañı soqağında, qırımtatarlar toplu yaşağan yerde yerleşe. İbadethaneni yerli sakin qurıp, cemaatqa bağışladı. Qırım Müftisi adından müsulmanlarnı Müfti yardımcısı Raim Ğafarov selâmladı. O, sakinlerni ibathaneniñ açıluvı ve keleyatqan Ramazan ayınen hayırladı. "İbadethaneniñ Ramazan ayınıñ arfesinde açıluvı – timsal kibidir. Allah işiñizni sevaplarğa yazdırsın", - dep ayttı Raim Ğafarov. Yedi Quyu rayonınıñ imamı Rustem Memetov köy sakinleri ve rayon, köy memuriyetine vesiqalarnıñ resmiyleştirilüvinde destek köstergenleri içün, teşekkürler bildirdi. Cami imamı Amet Dervişev ise, öz nevbetinde, Qırım müsulmanları Diniy idaresine minnetdarlığını bildirip, camige kelgen insanlarnıñ sayısı ep artacağına ümüt besledi. [gallery link="file" columns="4" size="medium" ids="15797,15795,15793,15791,15789,15787,15785,15783,15781,15779,15777,15775,15773,15771,15769,15767,15765,15763,15761,15759,15757,15755,15753,15751,15749,15747,15745,15743,15741,15739,15737,15735,15733,15731,15729"]
Ramazannı bekler eken! (FOTO)
Опубликовано:
Aqmescitte çoq balalı qorantalarnıñ balaları içün Ramazan ayına bağışlanğan bala bayramı olıp keçti. Tedbir Qırım ve Sevastopol müsulmanları Diniy idaresiniñ qoltutuvı ile "Büllür" müsulman qadınlarınıñ birleşmesi tarafından teşkil etildi. Qırq qadar çoq balalı qorantalarnıñ azaları olğan 80 bala Qırımnıñ farqlı köşelerinden keldi. Teşkilâtçılar meraqlı programmanı azırladılar. Balalarnı animatorlar eglendirdi, bundan da ğayrı, musafirlerni, Ernest Prtıhovnıñ reberliginde "Nesil" ansambliniñ oyuncıları öz çıqışlarınen ayrette qaldırdı. "Emanet" vokal taqımınıñ iştirakçileri ilâhiler ve anağa bağışlanğan türkü icra ettiler. Bayramnıñ soñunda balalarğa bahşişlar, ana-babalarğa ise Ramazan ayına ğıda torbaları berildi. QMDİ matbuat hızmeti [gallery link="file" columns="4" size="medium" ids="15821,15819,15817,15815,15813,15811,15809,15807,15805,15803,15801,15799"]
Aqmeçitte islâm kursları talebelerine Quranlar berildi
Опубликовано:
Aqmeçit qasabasında qurulğan camide islâm kursları mezunlarına tantanalı sürette Quran taqdim etildi Muqaddes kitapnı qadın kurslarınıñ sekiz talebesi aldı. Olar yedi ay devamında arap elifbesini, Quran oquvını ve İslâm dini temelini ögrendiler. Qırım Müftisi adından qadınlarnı Aqmeçit regional imamı Löman Abduramanov hayırlap, ileride de diniy bilgi almaq ve buña yaş nesilni celp etmek tiledi. Hatırlatamız ki, QMDİ "Faydalı ilim" maarif leyhası Quran oqumaqnıñ tez ögrenilüvi kurslarına davet ete. Programma eki usulda ömürge keçirile. Birincisi – "Ramazan devamında Quran oquvı". Dersler aftada eki kere 2,5 saat devamında ötkerile. Oqutuv künleri: cumaaqşamı künü saat 17:00 ve bazar künü saat 10:00. Kurs mayıs 20 – iyün 25 künleri devam etecek. Adres: Aqmescit ş., Kurçatov, 4 soqağı, QMDİ konferents-zalı. Yazılmaq içün telefon nomerası: +7 (978) 031-75-60. Ekinci usul "Faydalı yaz!". Dersler aftada bir kere, bazar künleri saat 10:00-da başlana. Adres: Aqmescit ş., Pobeda caddesi, 128, QMDİ "Faydalı ilim" medeniy-maarif Merkezi. Yazılmaq içün telefon nomerası: +7 (978) 014-51-63. Kurs üç ay – mayısnıñ 20-sinden – avgustnıñ 20-sine qadar – devam etecek: QMDİ matbuat hızmeti [gallery link="file" columns="4" size="medium" ids="15850,15848"]
Qırım Cümhuriyetiniñ başı ve qırımtatar halqınıñ Şura azaları 18 mayıs ile bağlı olğan tedbirlerniñ keçirilüvini muzakere ettiler
Опубликовано:
Qırım Müftisi haci Emirali Ablayev, qırımtatar halqı Şurasınıñ erkânında, Qırım Cümhuriyetiniñ Başı Sergey Aksönov ile körüşti. Toplaşuv devamında, mayısnıñ 18-de keçirilecek, Qırımdan sürgün etilgenlerniñ hatırasına bağışlanğan matem tedbirleriniñ keçirilüvi muzakere etildi. Böyleliknen, tedbirlerniñ çerçivesinde, mayısnıñ 18-de saat 9-da Qırımnıñ çeşit bölgelerinde qoyulğan hatıra işaretleri yanında güldestelerniñ qoyuluvı keçirilecek. Saat 11-de Qırım Cümhuriyeti Bağçasaray rayonınıñ "Süren" demiryol stantsiyası etafında tedbir – rekviyem ötkerilecek. Qırımnıñ bütün camilerinde cuma namazı devamında sürgünlik devamında elâk olğanlarnıñ ruhları dua ile añılacaq. Saat 21-de Aqmescitteki Lenin meydanında "Yüregiñde ateş yaq" adlı ananeviy hatıra tedbiri keçirilecek. Bundan ğayrı, Cümhuriyet Başı Sergey Aksönov, stalin sürgünligine oğrağan qurbanlarnıñ hatırasını pravoslav ibadet evlerinde de añmaq tevsiye etti. Sergey Aksönov, din ve millet mensüpligine baqmadan, Qırımdan sürgün etilgen halqlar Hatıra kününiñ büyük emiyetini qayd etti. Cümhuriyet Başlığı "Mayıs 18-niñ – yalıñız qırımtatarlar içün degil, Qırım Cümhuriyeti ve Rusiye içün emiti büyüktir. Adet üzre, akimiyet vekilleri bu matem tedbirlerinde daima iştirak eteler. Bu kün – sürgünlik qurbanları aileleriniñ azalarını, tanışlarını, yaqınlarını añmaq imkân bere. Amma aynı zamanda bu kün – qırımtatar halqı medeniyetiniñ, ananeleriniñ inikişaf etüv yolundaki umumiy işbirligimizdir. Eñ esası şu ki, böyle şeylerniñ tekrarlanmasına yol iç bir vaqıt berilmesin", dep ilâve etti. QMDİ matbuat merkezi (foto) Qırım Cümhuriyeti Başlığınıñ informatsiya ve matbuat merkezi İdaresi [gallery link="file" columns="4" size="medium" ids="15827,15837,15835,15833,15831,15829"]
«Hoş keldiñ, mübarek Ramazan!» bayramı balalarnı quvandırdı (FOTO)
Опубликовано:
Qırım ve Sevastopol şeeri müsulmanları Diniy İdaresiniñ erkânında faaliyet köstergen "Faydalı ilim" leyhası çerçivesinde "Hoş keldiñ, mubarek Ramazan!" adlı bayram keçirildi. Balalar, ösmürler ve ana-babalar içün tekşil etilgen bu tantanalı tedbir endi ananeviy oldı ve üçünci sefer ötkerile. Teşkilâtçılar yüksek seviyedeki azırlıq kördi. Musafirler ögünde "Emanet" adlı taqım çıqışta bulundı. "Emanet" er kes ile birlikte özüniñ 1 –yıllıq küçük yubileyini qayd etti. Bu qısqa vaqıt devamında solist-balalar endi bir çoq şey ögrenip, ustalıq ile ilâhi, yır ve şiir icra eteler, çeşit tedbir ve bayramlarda iştirak eteler, klip çekip azırlaylar. Keçirilgen bayramda "Nesil" oyun taqımınıñ oyuncıları (reber – Ernest Prtıhov) milliy ve milliy üslüpteki zemaneviy oyunlar taqdim etti. "Faydalı ilim" leyhasınıñ ve teşkilâtçılarnıñ reberi, İslâm dini esasları ocası Zeyneb Bairovanıñ aytqanına köre, esas maqsat – balalarğa "11 aynıñ Sultanı" - Ramazan ayınıñ emiyetini, faziletini añlatıp, oña nisbeten sevgi ve ilerideki hayatta da olarğa fayda ketirecek degerliklerni aşlamaqtır. Zeyneb Bairova: "Biz , ana-baba olaraq, elbette ki, balalırımızğa bu mevzuda kitap, ikâyeler, qıssalar oqup beremiz, subetler keçiremiz, kendimiz de ibadet meselesinde örnek olmaq tırışamız. Amma bu soy bayramlar balalarnı birleştire, olarğa bu muqaddes aynıñ quvançını ve tılsımlığını is etmek imkân asıl ete", dep qayd etti. "Faydalı ilim" ile endi daimiy sürette işbirlik yapqan "Pole çudes" adlı bala bayramınıñ Studiyası , unutılımaz teessurat ve hoş eglence kösterip, tedbirni yaraştırdı. Oğlan balaları içün keçirilgen armresling boyunca yarış da olarğa kendi küçü ve iradesini sınap baqmq imkân berdi. Bundan ğayrı, teşkil etilgen küçük Planetariyde balalar uçqan yıldız ve çeşit renkli seyyarelerni körip oldı. Analarnıñ çoqusı qayd etkenlerine köre, bu bayramğa balalarını endi başından berli, üçünci kere alıp kele. Ve er sefer güzel ve hoş duyğular ile qayta. İlki kelgen ana-babalar ise, oqutuv-maarif Merkezinde em İslâm dini boyunca, em mektepke azırlıq dersleri de keçirilgenini bildiler. Olarğa ocalar tarafından kerekli tavsilâtlı malümat berildi. Bayram çerçivesinde milliy üslüpte el işi örnekleri sergisi keçirildi. Aynı zamanda, fes tikip azırlamaq ve çeşit renkli qurabye yapmaq kibi master-klass kösterildi. Küçük hanım efendilerniñ elleri ise qına resimleri ile bezetildi. Soñunda er keske bahşiş ve yarış ğaliplerine ediyeler taqdim etildi. QMDİ matbuat-merkezi [gallery link="file" columns="4" size="medium" ids="15690,15688,15686,15684,15682,15680,15678,15676,15674,15672,15670,15668,15666,15664,15662,15660,15658,15656,15654,15652,15650,15648,15646,15644,15642,15640,15638,15636,15634,15632,15630,15628,15626,15624,15622,15620,15618,15616,15614,15612"]
“Ramazan ayı devamında Quran”. Qırım Müftiligi yañı kurslarnı aça
Опубликовано:
Qırım müsulmanları Diniy İdaresiniñ "Faydalı ilim" diniy-maarif leyhası Qurannı oqumaq ögreteken tezleştirilgen kurslarnı aça. Programma eki usul boyunca ömürge keçecek. Birinci usul – "Ramazan ayı devamında Quran". Dersler aftada eki kere 2,5 saat keçirilecek. Ötkerilecek künleri: cumaaqşamı saat 17:00 ve bazar künü saat 10:00. Kurslar mayıs 20 – den iyün 15 –ne qadar devam etecek. Adres: Aqmescit şeeri, Kurçatov soqağı, 4, QMDİ konferents-zalı. Yazılmaq içün telefon +7 (978) 031-75-60. Ekinci usul ise "Faydalı yaz!". Dersler aftada bir kere bazar künleri saat 10:00 keçirilecek. Ötkerilecek yeri: Aqmescit şeeri, Pobedı caddesi, 128, QMDİ "Faydalı ilim" medeniy-maarif merkezi". Malümat içün telefon: +7 (978) 014-51-63. Dersler üç ay, mayıs 2-den avgustnıñ 20-ne qadar devam etecek. QMDİ matbuat-hızmeti
Müftilikte fitir sadaqasınıñ miqdarı belgilendi
Опубликовано:
Mayıs 16 künü müsulmanlar içün muqaddes Ramazan ayı başlanacaq. Bu ay devamında musulmanlar aş, suvğa tek küneş batqandan soñ buyuracaqlar. Qırım müsulmanları Diniy İdaresi er sene Ramazan ayı devamında iftarlar keçire. İftarlar bütünley ya da qısmen keçirmege istegenler Qırım müsulmanları Diniy İdaresine muracaat ete bile. Adres: Aqmescit ş., Kurçatov soq, 4, ya da nevbetteki telefon nomeraları boyunca bağlanmaq mümkün: +7978 765 2070 Ridvan Maksudov, +7978 867 7849 Remzi Kurtdede Ramazan ayı devamında fikir sadaqası berilmek kerektir. Er bir yetişken ve maddiy imkânı olğan insan kendisi ve qorantasındaki yaşına yetmegen ya da mesül olğan aza içün fitir sadaqasını bermeli. Fitir sadaqası fuqarelerge berile. Bu sene sadaqanıñ miqdarı bir insan içün eñ azı 200 rubleni teşkil etti. QMDİ matbuat hızmeti
“Altın nesil” – Muhammed Peyğamberge (s.a.v.) mektüpler (FOTO)
Опубликовано:
"Altın nesil" bala-yaşlar klubında iştirakçilerniñ er aylıq körüşüvi olıp keçti. Tedbir QMDİ "Faydalı ilim" diniy-maarif leyhası çerçivesinde keçirildi. Tedbirde 15 insan iştirak etti. Ay devamında iştirakçiler farqlı yarışlardan, viktorinalardan ve kvestlerden keçti. Körüşüvde de viktorina, Sevimli Muhammed Peyğamberniñ (s.a.s.) ayatı aqqında subet ve "Muhammed Peyğamberge mektüp" yarışı keçirildi. Yarış şartları boyunca Peyğamberge (s.a.s.) bağışlanğan şiir ya da muracaatnı yazmaq kerek edi. Balalar vazifeni alâ derecede al ettiler. Olarnıñ samimiy mektüpleri jüri azalarını lâqayd qaldırmadı ve ğaliplerni seçip almaq kibi mürekkep vazifeni yerine ketirmek qolay olmadı. Birincilikni Ayşe Velilâyeva, Sureya Bairova ve Fatime Yusupova qazandılar. Klub reberleri onlayn yarışlarında faaliyet köstergen iştirakçilerni de taqdirledi. Körüşüv dostane ve sıcaq müitte keçirildi. Tedbirniñ soñunda balalar attraktsionlarda kezdiler. Hatırlatamız, "Altın nesil" bala musulman internet-klubı genç musulmanlar içün faaliyet köstermekte. Onıñ esas maqsadı: 10-16 yaşındaki gençler içün alternativ musulman qonuşuv meydanını qurmaqtır. Klub azası olmaq içün telefon nomerası: +79788639566. QMDİ matbuat hızmeti [gallery link="file" columns="4" size="medium" ids="14888,14886,14884,14882,14880,14878,14876,14874,14872,14870,14868"]
Aprelniñ 30-nı – mayısnıñ 1-ni bağlağan gece – Beraat gecesidir
Опубликовано:
2018 s. aprel 30 - mayıs 1 gecesi, müsulmanlar Beraat gecesini qarşılay. Arap. "Leylât-ül-Baraat" – "Günahlarnıñ af etilüv gecesi". Beraat gecesi – fazileti boyunca Qadir gecesinden soñ ekinci yerde turmaqta. Qırım camilerinde Beraat gecesine bağışlanğan çeşit tedbirler keçirilecek. Qırım Müftisi haci Emirali Ablayev cümle müsulmanlarnı Beraat gecesi ile hayırlay: "Bu gece Qırım müsulmanları keçmişlerniñ ruhuna dua bağışlaylar, Quran oquylar, ibadet eteler, Allahnıñ razılığını qazanmaq içün çeşit eyilikler ve hayriye işleri yapalar. Rabbimizden, dualarımıznıñ qabul etilüvini, epimizni günahlarımızdan ter-temiz etüvini, Ramazan ayını da birlik-beraberlikte sihhat-sağlıqta qarşılamamıznı tileyim". Beraat gecesi qamer Şaban ayınıñ 14-15-ni biri-birine bağlağan gece qayd etile. Hadislerde: "Allah mıtlaqa: "Menden af tilegen yoqmı? – Günahlarını bağışlayım. Menden rızıq istegen yoqmı? – Rızıq bereyim. Bir dertke oğrağan yoqmı? – Afiyet bereyim…" denile. QMDİ mutbuat hızmeti