Haberler
Qırım Müftiyatı Quran ögrenüvi boyunca Bütündünya teşkilâtı ile añlaşma tizdi
Опубликовано:
Cidda şeerinde (Saudiya Arbistanı Qırallığı) Qırım müsülmanları Diniy İdaresi ve Quran ögrenüvi boyunca Bütündünya teşkilâtı arasında işbirlik aqqında añlaşma tizildi. Resmiy körüşüv devamında Hacılıqnıñ teşkilâtlandıruvı ve tış alâqalar boyunca bölükniñ reberi Artur Reşitov ve Quran ögrenüvi boyunca Bütündünya teşkilâtı reisi Abdulla Basfar muzakereler alıp bardılar, neticede, eki yıllıq teneffüsten soñra, Qırımda şu teşkilât tarafından Quran ögrenüvi boyunca iş devam ettirilecegi belli oldı. Artur Reşitov Qırım Müftiyatı ve şahsen Qırım Müftisi hacı emirali ABlayev adından selâmlar, teşekkürlerni bildirdi. QMDİ MDT matbuat hızmeti
Qırım Müftisi muavini Mekkede din erbapları körüşüvinde iştirak etti (FOTO)
Опубликовано:
Türkiye Cumhuriyeti Diyanet işleri İdaresi reisi vazifesini eda etken Ekrem Keneş çeşit ülke ve devletlerniñ din erbapları ile ananeviy körüşüvni keçirdi. Körüşüv Diyanetniñ ofisinde ötkerildi. Tedbirde Acılıq missiyasınıñ reberleri, çeşit devletlerniñ Diniy İdareleri hadimleri iştirak ettiler. Rusiye hacılarını Qırım Müftisi muavini Ayder İsmailov, RMŞ hacılıq ve ümre departamentniñ reisi Ali Gürdin, Dağıstan Cumhuriyeti Müftisiniñ muavini Ahmad haci Kahayev, TC MDİ programmasınıñ reberi Ranis Vahitov temsil ettiler. Körüşüv devamında devlet vekilleri Hacılıq ile bağlı teessüratlarınen paylaştılar, bu ibadetniñ qabul etilmesi içün dua ettiler. Ayder İsmailov öz nevbetinde Qırım Müftisi hacı Emirali Ablayevniñ selâmlarını söyledi ve Ekrem Keleşke davet içün teşekkürler bildirdi. Ekrem Keleş, Qırım müsülmanlarını bayramnen hayırladı, Aqmescitte Cuma Caminiñ qurucılığına yüksek qıymet kesti ve qayd etkeni kibi, Türkiye Diyaneti ananeviy müsülman degerliklerini aşlamaq işinde Qırım Müftiyatına daima qol tutmaqta. İş körüşüvi devamında iştirakçiler Arakandaki (Birma) vaziyetni muzakere ettiler. Şu yerde yerli rohinca müsülmanlarını qıynap, öldüreler. Toplaşqanlar ögünde Myanma müsülmanlarınıñ vekili çıqışta bulundı. O tavsilâtlı şekilde vaziyetni añlattı. İştirakçiler adaletsizlikniñ toqtatılması içün dua ettiler. Arakan temsilcisi, er keske muracaat etip, müsülman devletlerniñ liderlerine öz noqta-i nazarını bildirip, halqara teşkilâtlarından zorbalıqnı toqtatmaq ve yardım etmekni talap etmege teklif etti. Hatırlatamız, bundan evel Türkiye Cumhuriyeti Prezidenti Recep Erdogan Arakandaki müsülmanlarğa qarşı zorbalıqnı toqtatmağa ve halqara cemaatçılığından adaletni tiklemege talap etti. QMDİ MDT matbuat hızmeti
Qurman Qurban bayramına davet ete!
Опубликовано:
Sentâbrniñ 3-nde Qurman qasabasında eñ müim müsülman bayramlarından biri – Qurban bayramı qayd etilecek. Tedbir Mekke Camisi yanında ötkerilecek. Bayram saat 15.00-te başlanacaq. Seyircilerni icadiy taqımlarnıñ kontsert programması, balalar içün attraktsionlar: batut, 3D-oyun, atlar qoşusı, bedava tatlılıqlar, dondurma ve popkorn ve ilâhre bekley. Balalarnı sevimli qaramanlar eglendirecek, bahşışlar darqatılacaq. Milliy Küreş boyunca yarışlarda yigitler ve balalar yarışlaşacaqlar. Ğalip – qoy qazanacaq. Bayram musafirleri içün sofralar donatılacaq. Mekke camisi Qurman qasabası,. 20 let Oktâbrâ soq., 2-a adresi boyunca yerleşe. QMDİ MDT matbuat hızmeti
Bulğanaq bayram qarşılaycaq! (FOTO)
Опубликовано:
Aqmescit rayonı Bulğanaq köyünde yerli müsülmanlar Qurban bayramına azırlanalar. Yerli sakinler adamlar toplaşacaq binanı, qorasını boyalap, kiriş yollarını temizlediler, etrafnı tertipke ketirdiler. QMDİ MDT matbuat hızmeti [gallery link="file" columns="4" size="medium" ids="7719,7717,7715,7713"]
Qırım Qurban bayramına azırlıq köre (FOTO)
Опубликовано:
Qırım camileri Qurban bayramına azırlanalar. Bağçasaray rayonı Bürlük köyünde imam Midat Tohtarovnıñ reberliginde yerli sakinler cami azbarı ve binasını tertipke ketirdiler. Esas işler endi yapıldı – çalılar pıçıldı, bağça temizlendi. Müsülmanlar qoranı boyaladılar, tereklerge ilâc septirdiler. Caminiñ binasında tamir işleri ötkerildi. İmamnıñ aytqanına köre, adamlar özleri teşebbüs kösterip, camini bayramğa azırlamağa istediler. "Yerli müsülmanlar camini seveler. Er bayram arfesinde azbarnı cıyıştıramız, boyalaymız, aqlaymız, temizleymiz. Asılında, cami diqqatsız qalmay. Cemaatımızğa teşekkürler, diqqatlı ve çeber adamlarımızğa maşallah!", - dedi Midat Tohtarov. Talaqada ösmürler de iştirak etti. Bürlük köyündeki cami yarımadanıñ esas yolları çatışqan yerde tura. Bulğanaq, Cav Cürek köylerinde de tamam böyle azırlıq kete. Mamaşay, Gölümbey ve başqa köylerniñ ibadehaneleri tertipke ketirile. QMDİ MDT matbuat hızmeti [gallery link="file" columns="4" size="medium" ids="7711,7709,7707,7705,7703,7701,7699,7697,7695,7693,7691,7689,7687,7685,7683"]
Qırımda birinci sınıf talebelerine çanta ve mektep aletleri bağışlandı (FOTO)
Опубликовано:
Aqmescitniñ "Seit-Settar" diniy kompleksinde çoqbalalı qorantalarnıñ balalarına çanta ve mektep aletleri bağışlandı. Merasimde Qırım Müftisi hacı Emirali Ablayev ve RF DD deputatı Ruslan Balbek iştirak ettiler. Hayırlav sözleri ile hacı Emirali Ablayev çıqışta bulundı. O, bala ve ana-babalarnı kelecek yañı oquv yılınen hayırlap, muvafaqiyetler tiledi. "Tasil – balalarımızğa teslim ete bilecek eñ müim şeydir. Eyi tasil alğan insan ögünde qısmet qapıları açıla. Balalarımız eñ eyi universitetlerde oqusın, bilgi alsınlar, halqına hızmet etsinler. Qırım müsülmanları Diniy İdaresi er taraftan yardım etmege azır", - dedi Müfti efendi. Ana-babalarğa ise, sabır ve ikmet tiledi. Müftiniñ fikirine DD deputatı Ruslan Balbek qoşuldı. Qayd etkeni kibi, bu kibi tedbirler halqnıñ küçü – birlikte saqlı olğanını köstere. "Bu hayırlı iş - göñüllerde tek eyi duyğular doğura. Bir qoranta olıp, biri-birimizge destek olamız", - dedi R. Balbek. Kiçikler bahşışlarnı alıp, quvandılar. Tamam şu yerde ana-babalarğa bahşışlarnı kösterip başladılar. Balalar içün tatlı sofralar donatıldı, şeñ animatorlar meraqlı programma azırladılar. Balalar oynap-külüp, yırladılar. Bir qaç künden soñ, olar rale başına oturacaqlar. Yañı, bilgi tolu ayat başlanacaq. QMDİ MDT matbuat hızmeti [gallery link="file" columns="4" size="medium" ids="7792,7790,7788,7786,7784,7782,7780,7778,7776,7774,7772,7770,7768,7766,7762,7760,7758,7756,7754,7752,7750,7748,7746,7744,7742,7740,7738,7736,7734,7732,7730,7728,7726,7724"]
“Faydalı ilim” yañı oquv yılını başlay
Опубликовано:
QMDİ MDT terkibinde çalışqan "Faydalı ilim" mektebi yañı oquv yılını başlay. 2017-2018 oquv yılına 8-12 yaş arasında balalar davet etile. Balalar yıl devamında tecvid qaideleri boyunca Quran oqumağa, İslâm dini esasları, Peyğamberler ayatını ögrenecekler. Dersler er cumaertesi künleri saat 10:00-dan 15:00-ke qadar meraqlı oyun şekilinde ötkerilecek. Birinci ders sentâbrniñ 9-nda saat 11:00-de olıp keçecek. Adresimiz: Aqmescit ş., Pobeda caddesi, 128. Telefon: +7978-892-07-26 QMDİ MDT matbuat hızmeti
“Faydalı ilim” mektebinde Til kursları açıla
Опубликовано:
Aqmescitteki "Faydalı ilim" mektebinde qırımtatar tili boyunca Kurslar açıla. Esas maqsad – talebelerni qırımtatarlarnıñ til edebinen tanış etmektir. Talebelerni qırımtatar tilini er künlük ayatta qullanmağa alıştıracaqlar. Nutuq inkişafı derslerinde balalar monolog, dialog qurmaq, şiir ve masallarnı sanalaştırmaq, subet etmek, rol boyunca oqumaqnı menimseycekler. Selâmlaşuv, teşekkür sözlerini qullanıp, til qabiliyetlerini inkişaf etecekler. Oquv ile birlikte yazuv da ögretilecek. Yılnıñ soñuna qadar balalar qırımtatar tiliniñ fonetik, grammatik hususiyetleri, teşrifat qaidelerinen tanış olıp, dialog qurmağa, suallerge cevap bermege bilecekler. Dersler er cumaertesi künleri saat 10:00-dan 13:00-ke qadar Aqmescitniñ, Pobeda caddesi, 128 adresi boyunca keçirilecek. Yazılmaq içün telefon: + 7978 835 42 78 QMDİ MDT matbuat hızmeti
Birinci sınıf talebelerine bahşış!
Опубликовано:
Avgustnıñ 28-nde saat 11:00-de Aqmescitteki Seit-Settar kompleksinde çoq balalı qorantalardan olğan birinci sınıf talebelerine bahşışlar berilecek. Tedbirni Qırım müsülmanları Diniy İdaresi, RF DD deputatı Ruslan Balbek ile birlikte azırladılar. Tedbirde Qırımnıñ çeşit regionlarından 219 bala iştirak etecegi közde tutula. QMDİ MDT matbuat hızmeti
Qırım müsülmanları Qurban bayramına azırlıq köreler
Опубликовано:
2017 s. sentâbrniñ 1-nde Qurban bayramı munasebetinen Qırım camilerinde bayram namazları ötkerilecek. Namaz saba saat 7-de başlanacaq. Aqmescitte bayram namazı Profsoyuzlar medeniyet Evinde (Kiyevskaya soq., 115) keçirilecek. Hutbe ve namaznı Qırım müsülmanları lideri hacı Emirali Ablayev ötkerecek. Qırımda bazarertesi künü, sentâbrniñ 4 raatlıq künü olaraq ilân etildi. Bunıñ aqqında qararnı Qırım Cumhuriyetiniñ reisi Sergey Aksönov imzaladı. Qurban bayramı - İslâm Dininiñ eñ büyük bayramlarından biri sayıla. Qurban bayramı Oraza bayramından 70 kün keçken soñ, Zul – Hica ayınıñ 10-ncı künü, İbrahim a.s. yapqan qurbanı munasebetinen qayd etile. Bu yıl Qurban bayramınıñ birinci künü sentâbrniñ 1-ne rastkele. QMDİ MDT matbuat hızmeti
Qırım Müftisi Cumhuriyetniñ İslâm-Terek rayonını ziyaret etti
Опубликовано:
Qırım Müftisi hacı Emirali Ablayev Qırımnıñ İslâm Terek rayonı, hususan, Küleç Meçit köyü ve Eski Qırım şeerinde iş ziyareti ile bulundı. Müfti efendi Eski Qırım şeerindeki milliy mektep ocaları, cemaatçılıq, diniy erbaplarnen körüşti. Körüşüvde RF DD deputatı Ruslan Balbek, Devlet milletler komitetiniñ reisi Zaur Smirnov iştirak ettiler. Tedbir iştirakçileri topraq, gazifikatsiya, yollarnıñ tamiri ve inşaatı, müsülman qabristanınıñ vaziyeti ve diger meselelerni muzakere ettiler. Mesele şunda ki, Eski Qırımnıñ yerli akimiyeti evelden müsülman qabristanı içün ayırılğan topraq damartısını keri alıp, mezarlıqnı başqa yerge köçürmege qarar aldı. Amma, şu yañı qabristanda endi bir qaç insan defn etilgeni içün, Qırım Müftiyatı yerli akimiyetke muracaat etip, 0,50 gektarlıq topraqnı Diniy İdareniñ imayesine bermege rica etecek. Bunıñnen beraber, tedbirde Küleç Meçit köyündeki qabristannı qoralamaq ve yerli caminiñ azbarında abdesthane qurmaq qararı alındı. QMDİ MDT matbuat hızmeti [gallery link="file" columns="4" size="medium" ids="7558,7556,7554,7552,7550,7548,7546,7544,7542"]
Çoqbalalı qorantalar – halqnıñ kelecegidir! (FOTO)
Опубликовано:
Bağçasaray rayonındaki çoqbalalı qorantalarnıñ 30-dan ziyade evlâtları Malosadovoye köyünde "İşaçok" raatlıq merkezini ziyaret ettiler. Mezkür tedbir, "Büllür" adlı Qırım musulman qadınlarınıñ Cemaat teşkilâtınıñ teşebbüsi ile ilân etilgen "Çoqbalalı qoranta – Qırımnıñ kelecegidir!" Aktsiyası çerçivesinde ötkerildi. Teşkilâtçılarnıñ bildirgenine köre, balalar içün ferma boyu ekskursiya, eşeçiklerde kezinti, çeşit eglenceli oyunlar keçirildi. Raatlıqnı teşkil etkenler: "Analar bu kibi diqqatqa büyük qıymet kestiler, çünki bir çoq aileler içün böyle kezinti ve quvançnı keçirmek zordır. Hususan, buña Qırımnıñ uzaq köylerinde yaşağan qorantalar muhtac. Bu kün bir çoq balalar yaz devamında ilk sefer köyünden başqa yerge çıqıp oldı. Pervasız qalmağan insanlarnıñ yardımı ile küçük qardaşlarımızğa vaqıtlarını böyle şekilde keçirmek imkânımız peyda olğanına biz de pek quvanamız", – dep qayd ettiler. "Büllür" adlı Qırım musulman qadınlarınıñ Cemaat teşkilâtı, tedbirni keçirmek ve ediyeler azırlamaq işinde büyük endirimler yapqanları içün büyük teşekkürler bildirmekte. Teşkilâtnıñ hadimi Niyara Canbazovanıñ sözlerine binaen, çoqbalalı ailelerniñ anaları da faal iştirak ettiler. "Bu – kendi qorantasına, halqına nisbeten mesülietlikniñ köstergiçidir. Rabbimiz ziyadesinen qaytarsın. Evlerinde daima bereket ve Allahnıñ razılığı olsun. İnşaAllah!", – dep tiledi Niyara hanım. Qırımnıñ diger bölüklerinde de aynı aktsiyalar aqqındaki malümatnı "Büllür" teşkilâtınıñ içtimaiy ağlarda yerleştirecek ilânlardan haberdar olmaq mümkün. QMDİ MDT matbuat-merkezi [gallery link="file" columns="4" size="medium" ids="7512,7510,7508,7506,7504,7502,7500,7498,7496,7494,7492,7490,7488,7486,7484,7482,7480,7478,7476"]