Ürmetli dindaşlar, ağalarım, qardaşlarım!
Mubarek Ramazan ayı keldi!
Maneviy arınuv, ayatımıznı közden keçirüv, üstümizde çalışıp, dinde ilerilev ve imannı pekitüv mevsimidir Ramazan. Şu mubarek ayda aziz Kitabımız – Quran-ı Kerim enmege başladı ve Peyğamberimiz Muhammed Mustafanıñ (s.a.s.) peyğamberlik vazifesi başlandı.
Ramazan ayında tutulğan oraza – imanımıznıñ qaviyligini, yüreklerimizniñ merhametini, fikirlerimizniñ temizligini ve amellerimizniñ eyi oluvını sınağan bir ibadettir. Oraza, bir taraftan, qıyınlıqtır, lâkin mukâfatı hatırlanğanda, onı qolaylıqnen tutamız.
Ayatımızdaki bütün qıyınlıqlarnı Yüce Rabbimizden bir imtian olaraq qabul etsek, bu – insannı ve cemiyetni daa quvetli yapa. Allah Taalâ “Qıyınlıqtan soñra qolaylıq bar” sözünen bizge sabırlı, küçlü ve birdem olmamıznı emir ete.
Ramazan ayınıñ er bir daqiqası qıymetli olğanını hatırlap, şu vaqıtnı Allah ögünde mesülietimizni añlap keçirmelimiz. Şu ay – tefekkür, ğayret, teslimiyet ve Yaratıcımıznıñ ikramları soñsuz olğan bir zamandır!
Bugünki vaziyetni köz ögüne alıp, özüñizni ve digerlerni tehlikege atmadan, koronavirus hastalığınıñ darqalmamasına yönelik havfsızlıq qaidelerine riayet etmeñizge çağıram.
Dindaşlarımızğa şu mubarek vaqıtnı ibadetler içinde, evelâ, farz orazanı tutıp ve teravih namazlarını qılıp, buña ilâve olaraq, çoqça Quran oqup, yaqınlarımıznı quvandırıp, sadaqa berip, bir-birimizge nisbeten sabırlı olıp keçirmege tileymiz.
Yüce Rabbimiz ibadetlerimizni eñ güzel şekilde yerine ketirmege yardım etsin. Ramazan ayında Yüce Rabbimiz Qırım musulmanları içün merhamet qapılarını açsın, hastalarğa şifa, dertlilerge deva bersin, bir-birine asret olğanlarnı qavuştırsın.
Yüce Rabbimiz orazalarımıznı, dualarımıznı ve eyi amellerimizni qabul etsin!
Allahnıñ selâmı ve merhameti üstüñizde olsun!
Qırım Müftisi hacı Emirali Ablayev