QMDİ MDT “Elâl” sertifikatsiya merkeziniñ rehberi Remzi Qurtdede Aqyar Devlet universitetinde keçirilgen “Aqyar gençleri arasında “Elâl”-nı saqlap qaldırmaq ve inkişaf ettirmek” iyevzusı boyunca keçirilgen tögerek masa esnasında maruzası ile çıqışta bulundı. Tedbir Qırım Cumhuriyeti ve Sevastopol şeeri musulmanları Diniy idaresiniñ (Tavriya Müftiyatınıñ) yerli “Münevver” musulman din cemiyeti, “Aqyardaki qazan tatarları ve başqurtlarnıñ milliy-medeniy cemiyeti” yerli cemaat teşkilâtı ve “Elâlnı saqlav ve inkişaf ettirüv fondu” ğayr-ı ticariy teşkilât tarafından teşkil etildi.
Remzi Kurtdede öz çıqışında Aqyar gençleriniñ cemaatçılıq faaliyetini, maqsatlarına irişüv ve iş tapuvınıñ kölemini, “Elâl” saasında, ferdiy iş adamı ve şirket olaraq, emek ve ticariy faaliyet istegini arttırmaq içün alınğan qararlarnıñ beraberce şekillendirilmesi aqqında tarif etti.
Elâl sanayı aqqında sözge keçken Remzi Qurtdede qayd etti ki, elâl sertifikatnı alğan iş adamları göñülli olaraq İslâm şartlarına köre iqtisadiy faaliyetlerini alıp baralar. Qırım Cumhuriyetinde bu saanıñ inkişafı 2008 senesinden başladı. Bugünki künde yüzden ziyade iş adamı elâllıq sertifikatını elde etti ve er sene onı tasdiq etmek içün teşkerüvden keçeler. “Qırımda ve Rusiyeniñ diger bölgelerinde elâl mahsulatlarğa olğan talap yıl sayın arta. “Elâl” logotipli yemekhanelerniñ sayısı ep arta, ve olar eali arasında ğayet populârdır”, – dep, qayd etti QMDİ “Elâl” sertifikatsiya merkeziniñ rehberi Remzi Kurtdede.
Qırım MDİ matbuat hızmeti