Yaz – tek tatili deviri degil, yañı bilgiler ögrenmek içün de kelişken bir vaqıttır.Qırım Cumhuriyeti ve Sevastopol şeeri musulmanları diniy idaresiniñ qadınlar bölügi ocaları faydalı şeylerni hoş vaqıt keçirip ögretmekniñ, yaz tatili mevsiminde balalarğa İslâm temellerini aşılamaqnıñ yollarını bileler.
Eki yaz ayı devamında yarımadamıznıñ camileri yanında balalar ve ösmürler içün yazlıq meydançıqları çalışa.Bazı bölgelerde meydançıqlar artıq yekünlendi ve şu munasebet ile tantanalı tedbirler olıp keçti.Meselâ, keçken raatlıq künlerinde Aqmescitniñ Borçoqraq qasabasında yazlıq lageri yekünlendi. “Eki afta devamında biz Avva Asanova ve Adile Datlıyeva ile birlikte balalarnen çalıştıq, meraqlı dersler keçirdik, qırımtatar tili, qızlar içün yipten örmek ve saçlarnıñ örülmesi boyunca derslerni alıp barmaq içün, mahsus ocalar çağırdıq, balçıqtan yapuv boyunca master-klasslar keçirdik”, – dep, balalar lageri aqqında tarif ete din ocası Feride Asanova.
Tedbir devamında imam Lüman Vefayev Qurandan bir sure oqudı, soñra arap elifbesini ögrenip, Quran oquvına keçken balalarğa fahriy yarlıqlar taqdim etildi.Bundan da ğayrı, yazlıq meydançıqnıñ teşkilâtçıları tatlı sofralar donattı ve animatorlarnı davet ettiler.
Aynı şu künü Canköy rayonınıñ Qalay (Azovskoye) qasabasında Elifbe bayramı olıp keçti. Tedbir devamında kiçkeneler taqımından beş bala bahşış olaraq Qurannı aldı.
Qırım MDİ matbuat hızmeti