Хаберлер
Къырым Муфтилиги апистеки мусульманларны Ораза байрамынен хайырлады
Опубликовано:
Къырым Муфтисининъ муавини Мухаммед Исламов Къырым Муфтиси хаджы Эмирали Аблаевнинъ авалесинен Акъмесджиттеки аписханелерни зиярет этти. О, №1 ве № 2 тахкикъат изоляторларында, №1 тюзетюв колониясында джезаларыны чеккен мусульманларны Ораза байрамынен хайырлады. Муфти муавини бир чокъ татлылыкъларны ве аньаневий ашларны кетирип, теслим этти, ве, эм де, маневий арынмакъны, сабырлы ве кучьлю олмакъны тиледи. «Бу айдын байрам Аллах тарафындан багъышлангъан омюрлеринъизнинъ манасыны янъыдан тюшюнип анъламакъ фырсаты ичюн бир себеп олсун, сизинъ рухунъызны котерсин. Сизге тездже къоранталарынъызгъа ве барышыкъ, намуслы ве низамлы аяткъа къайтманъызны джан-юректен тилейим», – деп, апислилерге мураджаат этти Мухаммед Исламов. Къырым Джумхуриети ве Севастополь шеэри мусульманлары диний идареси хайырлавларны тешкиль этмеге ве байрамлыкъ такъымларыны азырламагъа ярдым эткен иш адамларына ве гонъюллилерге тешеккюрлер бильдире. Байрам куньлери диний идаремизнинъ бойле зияретлери артыкъ гузель бир аньанеге чевирильди ве апистеки мусульманларнынъ маневий тарафтан дестекленмесине ёнелик олып, оларнынъ тюзельмелерине сильтем бере. Къырым МДИ матбуат хызмети
Къырым Башлыгъы мусульманларны Ораза байрамынен хайырлады
Опубликовано:
Къырымнынъ Башлыгъы мусульманларны мубарек Ораза байрамынен хайырлады: «Къырым мусульманларыны ве умумен бутюн мусульманларны Ораза байрамынен хайырлайым! Бу къадимий байрам мубарек Рамазан айынынъ екюнленювини бельгилеп, эйилик, мерхаметлик, маневий арынув киби улу ве эбедий къыйметлерни темсиль эте. Олар эр бир миллет ве дин векили ичюн муим олып, бизни бирлештире, бизге кучь бере. Къырым сакинлери бутюн халкъларнынъ динлерине ве аньанелерине буюк дикъкъат ве урьметнен янашалар. Бу – бизим Къырым менталитетимизнинъ хусусий бир чизгиси олып, Русиенинъ бар олувы ве инкишафы ичюн де даимий бир эсастыр. Мусульман джемиети Къырым топрагъында барышыкълыкъ ве муаббетликнинъ къавийлешювине буюк иссе къошып, хайрие, диний маариф, ватанперверлик тербиеси сааларында буюк тешеббюслерге эль ата. Айры дикъкъат джебхеге ярдым, арбийлеримизге ве оларнынъ къоранталарына дестек ичюн айырыла. Мусульман аскерлеримиз уруш аркъадашларынен бирликте яманлыкънен курешелер, адамларымызны ве биз ичюн къыйметли ве азиз олгъан эр шейни къорчалайлар. Къырым ве Севастополь мусульманлары диний идареси иле акимиетимизнинъ ишбирлиги гъает гузель ве семерелидир. Бу байрам куню Къырым сакинлерине сагълыкъ, эйи аллар, маневий къуванч ве бахт тилейим!» Къырым МДИ матбуат хызмети
РФ Президенти мусульманларны Ораза байрамынен хайырлады
Опубликовано:
Русие Федерациясынынъ Президенти Владимир Путин мусульманларны мубарек Ораза байрамынен хайырлады: «Юзьйыллар девамында бу байрам инангъанларнынъ маневий инкишафкъа, мерхаметликке ве шефкъаткъа ынтылувларыны акс эте, оларны Ислямнынъ бакъий къыйметлерине ёнлендире. Къайд этмели ки, Русие мусульманлары эдждатларынынъ тарихий ве маневий къыйметлерине буюк урьмет иле янашып, байрамны джемааты ве къоранталарынен бирликте къайд этелер. Мубарек ай девамында кутьлевий хайрие, медений-маариф ве бала тедбирлерининъ кечирилюви гузель бир адетке чевирильди. Мусульман тешкилятлары къоранта муэссисесининъ къавийлешювине, яш несильнинъ тербиесине, девлет ве джемаат тешкилятларынен конструктив диалогнынъ инкишаф эттирильмесине япыджы бир иссе къошалар, ватанперверлик, маариф ве гуманитар тешеббюслернинъ аяткъа кечирильмеси ичюн буюк дикъкъат айыралар. Айры тешеккюрлерни де, эбет, Ватаннынъ азатлыгъы ве мустакъиллиги ичюн уруш аркъадашларынен берабер бир сафта дженклешкен, къараманларымызнынъ къоранталарына ве якъынларына ярдым эткен мусульманларгъа бильдиремиз». Къырым МДИ матбуат хызмети
Къырым Муфтиси Ораза байрамынен хайырлады
Опубликовано:
Къырым Джумхуриети ве Севастополь шеэри мусульманларынынъ Муфтиси хаджы Эмирали Аблаев мусульманларны Ораза байрамынен хайырлады: «Урьметли мусульманлар, къыйметли ватандашларым! Джан-гонъюльден сизни Ораза байрамынен хайырлайым! Бу къуванчлы кунь – бизге Рамазан айы девамында косьтергенимиз сабырнынъ ве мерхаметликнинъ, эда эткенимиз ибадетлернинъ Аллахтан мукяфатыдыр. Оразаларымыз, самимий дуаларымыз ве эйи ишлеримиз къабул олсун, маневий инкишафымызнынъ ве Аллах ризасынынъ темели олсун. Ораза байрамыны къорантанен берабер къайд этмекнинъ хусусий къуванчы бар. Балаларымызгъа ве торунларымызгъа Рамазан огреткен эсас икметлерни – мерхаметли ве намуслы олмакъны, бильгилерге ынтылувны ашылайыкъ. Ораза байрамы – бирлик, къомшусеверлик ве бири-биримизге урьмет байрамыдыр. Бизим чокъмиллетли ве чокъдинли Къырымда о, миллетлерара барышыкълыкънынъ дюльдерлигини де ифаде эте. Къоранталарынъызгъа къавий сагълыкъ, эйилик, гонъюль раатлыгъы ве самимий иман тилейим. Эр бир эвде къуванч, берекет ве Аллахнынъ мерхамети олсун! Къырым МДИ матбуат хызмети
Кезлевде «Мерхаметлик дерслери»
Опубликовано:
«Мерхаметлик лялеси» бутюнкъырым хайрие акциясы черчивесинде Кезлевде бир сыра маариф тедбирлери олып кечти. Кезлев шеэрининъ баш имамы Эскендер Меметов бир къач мектепнинъ талебелери ичюн «мерхаметлик дерслерини» кечирип, шефкъат, ярдымлашув ве эйи ишлернинъ муимлиги акъкъында тариф этти. Биринджи дерс Исмаил бей къасабасында ерлешкен И. Б. Булатов адына №18 мектепте кечирильди. Имамнен корюшювге 8 ве 11 сыныф талебелери кельдилер. Бундан да гъайры, имам эфенди №8 гимназияны зиярет этип, 1, 2, 8 ве 11 сыныф талебелеринен эки дерс кечирди. Сухбет хайриенинъ темелинде олгъан маневий къыйметлерге багъышлангъан эди. Талебелерге саде тиль иле мерхаметлик тариф этильди ве кичкене бир эйиликнинъ биле дюньяны денъиштире биледжеги анълатылды. Бу корюшювлер «Мерхаметлик лялеси» акциясынынъ муим бир къысмы олды. Шу акциянынъ макъсады – агъыр хаста балаларгъа ярдым этмекнен берабер яш несильге шефкъат дуйгъусыны ашыламакъ ве мухтадж олгъанларгъа ярым этмеге огретмектир. Къырым МДИ матбуат хызмети
Къырым Муфтилиги МАО иштиракчилерине ярдым этмеге девам эте
Опубликовано:
Къырым Джумхуриети ве Севастополь шеэри мусульманлары диний идареси (Таврия Муфтияты) махсус арбий операцияда иштирак эткен арбийлерге невбеттеки гуманитар ярдымыны ёллады. Къырым Муфтисининъ месуль кятиби Айдер Аджимамбетов Къырым мусульманлары ве Муфти эфенди адындан керекли шейлерни теслим этти: сыджакъ урбалар, тюп урбалар, аякъкъаплар, шахсий темизлик эшьялары ве эрзакъ. Къырым Муфтилиги даимий шекильде джебхеге гуманитар ярдымлар топлап ёллай, бундан да гъайры, арбийлернинъ къоранталарына дестек косьтере. Ватан къоруйыджыларына ярдым этмек – бизим умумий маневий ве ватандашлыкъ борджумыздыр. Къырым МДИ матбуат хызмети
Акъмесджитте къадынларнынъ джумхуриет хайрие ифтары олып кечти
Опубликовано:
Къырым пайтахтында, маневий бирлик ве мубарек Рамазан айы муитинде къадынларнынъ джумхуриет хайрие ифтары олып кечти. Артыкъ аньаневий олгъан бу парлакъ вакъиа Къырым Джумхуриети ве Севастополь шеэри мусульманлары диний идареси эркянында чалышкъан «Алем-и нисван» къадынлар ислямий медений-маариф меркези тарафындан тешкиль этильди. Акъшамнынъ баш гъаеси, эр вакъыт олгъаны киби, мерхаметлик олды. Ифтарнынъ эсасыны «Мерхаметлик лялеси» акциясыны дестеклеген хайрие ярмалыгъы тешкиль этти. Бу сене акция 5 йыллыкъ юбилейини къайд эте. Бу йыллар девамында ляле чичеги шефкъатнынъ ве ярдымнынъ керчек тимсали олды. 2026 сенеси бутюн топлангъан паралар агъыр хаста балаларны тербиелеген къоранталаргъа ве МАО иштиракчилерининъ къоранталарына ёлланыладжакъ. Зал буюк севги иле безетильди, оны балалар ве буюклер тарафындан кягъыттан, къумачтан ве боюнджакълардан япылгъан лялелер яраштырды. Эр бир чичек тек бирер ильван олмакъта къалмайып, ярдымгъа чагъыргъан бир нида олды. Акъшамны «Алем-и нисван» меркезининъ рехбери Зенифе Аблаева ачып, ифтарда булунгъанларны маневий арынув ве джумертлик айы – Рамазан айынен хайырлады. Бундан да гъайры, о, къайд этти ки, залда фаркълы миллет векиллеринден мусафирлер топланды, бу исе, достлукъ ве динлерара барышыкълыкънынъ тимсалидир. «Бугунь залымызда садедже мусафирлер дегиль де, энъ гузель къадынлар топланды. Эр биринъиз уникальсинъиз ве истидатлысынъыз. Айны сизинъ энергиянъыз бизим эйи ниетлеримизни реаль ишлерге чевире. Бу мубарек акъшамны сизнен берабер кечирмектен пек мемнюним», – деп, къайд этти Зенифе Аблаева. Айры тешеккюрлер исе, озь мевамы, иджады ве профессионаллигинен этрафтакилерге ильхам берген къадынларгъа бильдирильди, бу къадынлар фаркълы номинацияларда такъдирлендилер. Келеджек несиллерни тербиелеген ве оларгъа диний бильгилер огреткен дин оджалары да айрыджа къайд этильди. Оларнынъ буюк эмеклери келеджегимизнинъ темелидир. Акъшамнынъ урьметли мусафирлери арасында «Рус бирлиги» больгелерара джемаат тешкилятынынъ рехбери Елена Аксёнова да олды. О, тешкилятчыларгъа давет эткенлери ичюн тешеккюр бильдирип, бойле тедбирлернинъ муимлигини къайд этти. Ифтарнынъ медений программасы акъшамны яраштырды. Мусафирлер миллий оюнлардан ве иляхийлерден зевкъ алдылар. «Алем-и нисван» меркезининъ тарихы ве чокътарафлы фаалиети, къадынлар ичюн азырлангъан ильк меджмуанынъ тарихы ве «Мерхаметлик лялеси» акциясынынъ беш йыллыгъы акъкъындаки видеолевхалар сейирджилерге айры шекильде тесир этти. Акъшам ифтарнен екюнленди, амма ондан сонъра да мусафирлер даа чокъ таркъамайып къонуштылар. Сыджакъ ве гонъюльден бир муитте тебессюмлер ве илеридеки эйи ишлер ичюн планларнынъ музакереси укюм сюрди. Къырым МДИ матбуат хызмети
Къырым Муфтилиги Херсон виляетининъ Новоалексеевка къасабасында ифтар кечирди
Опубликовано:
Херсон виляетиндеки Новоалексеевка къасабасынынъ джамисинде мусульман дюньясында энъ муим геджелеринден бири олгъан Къадир геджесине багъышлангъан ифтар кечирильди. Тедбир Къырым Джумхуриети ве Севастополь шеэри мусульманлары диний идареси тарафындан тешкиль этилип, больгедеки мусульман дин джемиетлерине дестек аньанесини девам эттирди. Бу мукъаддес гедже Рамазан айынынъ сонъки он геджелерининъ бирине тюше. Мусульманлар инаналар ки, айны бу вакъытта такъдирлер денъише, Аллахнынъ мерхамети ве багъышлавы инсанлар устюне ягъа. Бу геджеде кечирильген ифтар да символик мананы ташып, джемиетни ибадетте, тефеккюрде ве маневий арынувда бирлештире. Ифтар софрасында ерли сакинлер топланып, теравих намазларыны къылдылар ве бу гедженинъ юджелиги акъкъында сухбет динъледилер. Херсон виляетининъ Новоалексеека коюнде бойле ифтарнынъ кечирилюви больгеде КЪМДИ рехберлигинде Ислям инфрастуктурасынынъ дестекленмеси ве инкишафы ичюн муим бир адым олды. Къырым МДИ матбуат хызмети
Къырым Муфтиси адындан джумхуриет ифтары
Опубликовано:
Рамазан айынынъ сонъки кунюнде, Ораза байрамынынъ арефесинде Къырымда Къырым Муфтиси хаджы Эмирали Аблаев адындан буюк джумхуриет ифтар кечирильди. Тедбирде фаркълы зенаат саилери, джемаат фаалиетчилери, акимиет векиллери ве дин эрбаплары топландылар. Мусафирлер огюнде Къырым Джумхуриети ве Севастополь шеэри Муфтиси хаджы Эмирали Аблаев сёзге чыкъты. О, топлангъанларны оразанынъ сонъки кунюнде селямлады. «Биз Рамазаннынъ сонъки кунюнде берабердже ифтар этмек ичюн, бу акъшам юреклеримизни келеджек Рамазангъа къадар къыздырсын деп топландыкъ. Коремиз ки, джамилеримиз бутюн Рамазан айы девамында толуп ташты, куньлеримиз ве геджелеримиз ибадетлернен толу кечти. Ибадетлер къылдырып, насиат этип, инсанларны бирлештирип, джемиетимизге хызмет эткен имамларымызгъа буюк тешеккюрлер бильдирем», – деди хаджы Эмирали Аблаев. Муфти эфенди ярымадада миллетлерара ве динлерара барышыкълыкъны сакъламакъ ичюн дин эрбапларынынъ муим ролюни айрыджа къайд этти. «Бугунь Къырымда укюм сюрьген бирлик, муаббетлик ве эйи къомшулыкъ буюк ольчюде имамларымызнынъ эмегидир. Олар инсанларгъа керчек бильгилерни огретелер, мерхаметлик ве къаршылыкълы урьмет принциплерини анълаталар», – деп, къайд этти о. Озь чыкъышында Муфти эфенди Русие Федерациясынынъ Президенти Владимир Путинге ве Къырым Джумхуриетининъ рехберлигине Къырымда динимизни сербест кутьмек имкянымыз ичюн буюк тешеккюрлер бильдирди. Айры тешеккюрлер Ватан къоруйыджылары ичюн айтылды, айны олар барышыкълыкъны ве тынчлыкъны темин этип, инангъанларгъа ибадетлерини сербест ерине кетирмеге имкян берелер. «Атеш» къырымтатар оюн ансамблининъ чыкъышлары акъшамнынъ медений ярашыгъы олды. Бунъа иляве оларакъ, акъшам девамында «Мерхаметлик лялеси» хайрие акциясынынъ махсулатлары такъдим этильди. Хайрие акциясына эр бир мусафир къошулып олды. Къырым МДИ матбуат хызмети
«Элял» сертификатларынынъ девам эттирилюви
Опубликовано:
Къырым Джумхуриети ве Севастополь шеэри мусульманлары диний идаресинде «ЗАРЯ» ширкети – «KRIMSKIY SULTAN» ве «ТАВРИДА» тиджарет маркаларына ве иш адамы Аркан Ольга Петровнагъа «Элял» сертификатларынынъ девам эттирилюви акъкъында весикъалар такъдим этильди. Сертификатларнынъ такъдими черчивесинде Къырым Джумхуриети ве Севастополь шеэри Муфтиси хаджы Эмирали Аблаевнен корюшюв олып кечти. О, иш адамларына инсанларнынъ эйилиги огърунда семерели чалышмалар тиледи. Ихтар: Эляллыкъ сертификатны алмагъа истеген иш адамлары КъМДИ «Элял» сертификация меркезининъ башлыгъы Ремзи Къуртдедеге невбеттеки телефон боюнджа мураджаат эте билелер: +79780741847, я да эл.адрес: halal@qmdi.ru Къырым МДИ матбуат хызмети
Къырымда Джумхуриетимизнинъ Башлыгъы берген аньаневий ифтар олып кечти
Опубликовано:
Акъмесджитте Къырым Джумхуриетининъ Башлыгъы Сергей Аксёнов тарафындан ярымадамызнынъ мусульман джемиети ичюн тешкиль эткени аньаневий ифтар кечирильди. Ифтар Къырым Джумхуриети ве Севастополь шеэри мусульманларынынъ Муфтиси хаджы Эмирали Аблаевнинъ иштиракинен олып кечти. Къырымнынъ эр тарафындан кельген юзьден зияде джемаат, сиясет ве дин эрбапларыны бир арада топлагъан тедбир миллетлерара барышыкълыкънынъ гузель бир тимсали олды. Къырым Джумхуриетининъ Башлыгъы Къырым Джумхуриети ве Севастополь шеэри мусульманлары диний идаресине ве шахсен Къырым Муфтисине аньаневий къыйметлернинъ сакъланылувына къошкъан исселери, къырымлыларнынъ бирлигини пекитмелери ве Русие Президенти иле Махсус арбий операция иштиракчилерине дестек косьтергенлери ичюн тешеккюр бильдирди. «Мусульманлар ичюн мубарек Рамазан айы – дуа, маневий арынма, мерхаметлик ве эйи ишлер заманыдыр. Биз Къырым Муфтиси хаджы Эмирали эфенди иле ифтарны кечирмек, инанчлыларнен бир софрада олмакъ ичюн топландыкъ. Къырым сакинлери бири-бирининъ аньанелерине буюк дикъкъат ве урьмет иле даврана. Бугуньки корюшювимиз исе, – Къырымда укюм сюрьген бирлик, муаббетлик ве анълайышнынъ косьтергичидир», – деди Сергей Аксёнов. Къырым Муфтиси хаджы Эмирали Аблаев ифтар иштиракчилерини селямлады, Русие Президентине ве Къырым Джумхуриетининъ Башлыгъына динлерара барышыкълыкънынъ сакъланмасына ёнелик сиясетлери ичюн тешеккюр бильдирди ве Ватан къоруйыджыларына миннетдарлыгъыны бильдирди. «Эгер биз бирлик олсакъ, бизни келеджекте рефах ве инкишаф беклей, амма, эгер айрылыкъкъа тюшсек, келеджегимиз олмайджакъ. Сёзлерим тек къырымтатар халкъы акъкъында дегильдир, Къырымнынъ бутюн сакинлери ве умумен девлетимиз акъкъындадыр», – деп, къайд этти Муфти эфенди. Ифтарнынъ тешкиль этилюви ичюн тешеккюр оларакъ, Муфти бей Сергей Аксёновгъа Къырымнынъ Буюк Джума джамиси иле ресимни такъдим этти. Бундан да гъайры, тедбир эснасында Къырым мусульманлары диний идареси адындан джемиетте фааль олгъан иш адамларына умумий ишке иссе къошкъанлары ичюн тешеккюрнамелер берильди. Къырым МДИ матбуат хызмети
«Восточный букет» Къырым джамилериндеки ифтарларгъа дестек косьтерди
Опубликовано:
Мубарек Рамазан айында Къырым Джумхуриети ве Севастополь шеэри мусульманлары диний идареси (Таврия Муфтияты) белли тюрк татлылыкълары бренлерининъ истихсалджысы ве дистрибьюторы «Восточный букет» («Шаркъ дестеси») ширкетинден хайрие ярдымыны алды. Мезкюр ширкет ярымадамызнынъ джамилеринде кечирильген ифтарларда оразалыларны сыйламакъ ичюн 150 къуту аньаневий шаркъ татлылыкъларыны – локъумларны йиберди. Татлылыкълар районларнынъ баш имамлары вастасынен такъсим этильди, олар татлылыкъларны районларында ифтарлар кечирильген джамилерге теслим этеджеклер. Къырым Муфтилиги «Восточный букет» ширкетине япкъан эийлиги ве мусульман джемиетининъ ихтияджларына дикъкъаты ичюн тешеккюр бильдире. Къырым МДИ матбуат хызмети