Haberler
Qırım camilerinde Reğaib gecesini qarşıladılar
Опубликовано:
Qırım musulmanları camilerde dinimizde mubarek sayılğan gecelerden biri – Reğaib gecesini qarşılap keçirdiler. Saqnıñ Yañı camisinde iftar teşkil etildi ve Reğaib gecesine bağışlanğan diniy suhbet keçirildi. İftarğa kelgen er kes davet etildi. Saq rayonınıñ baş imamı Mesfer Settarov musulmanlarğa Üç aylarnıñ emiyetini açıqladı. Tedbirniñ soñunda musulmanlar dua ettiler ve tesbih namazını qıldılar. Qırım MDİ matbuat hızmeti
Mubarek Üç aylar başlandı
Опубликовано:
Qırım Cumhuriyeti ve Sevastopol şeeri musulmanları diniy idaresi bütün musulmanlarnı mubarek Üç aylarnıñ başlanuvı ile hayırlay. Yanvar 11-de, 2024 senesi (hicriy taqvim boyunca 1445 senesi), aqşam namazından soñ mubarek Üç aylar diye bilingen devir başlandı. Recep – tövbe, suhbet ve ibadet ayıdır. Şaban – sevgi ve hızmet ayıdır. Ramazan ise, – oraza, Allahqa yaqınlaşuv ve bereket ayıdır. Muhammed peyğamber (s.a.s.) Recep ayınıñ başlamasınen böyle dua ayta edi: "Allahım! Bizler içün Recep ve Şaban aylarını mubarek et, ve bizlerni (aman-esen) Ramazan ayına qavuştır!" Şu devirde musulmanlar çoqça hayırlı ameller işlemege tırışalar: Quran oqup, oraza tutıp, sadaqa berip, tövbe etip, namaz qılıp, göñülni günahlardan temizlenmege, aqılnı da yaramay fikirlerden arındırmağa tırışalar. Şu mubarek aylarda Allah Taalâ eyiliklerniñ, ibadetlerniñ savabını qat-qat arttıra, samimiy tövbe etkenlerniñ günahlarını afu ete. Recep – Allahnıñ öz qullarına merhametinen nasip etken mubarek aylarnıñ birincisi olıp, haram aylardandır. Şu aynıñ birinci kününde oraza tutmaq tevsiye etile. Nevbetteki ay – Şaban ayıdır. Şu ayda oraza tutqan musulmanlar em büyük savap qazanalar, em de Ramazan orazasına azırlanalar. Ramazan – mubarek üç aynıñ soñkisidir, bu ayda oraza tutmaq farzdır. Oraza künleri Oraza bayramınen yekünlene. Bayram künlerinde musulmanlar büyüklerini ziyaret eteler, bayram namazını qılalar, fitir sadaqalarını bereler. Şu üç ay içinde mubarek geceler de bar – Reğaib, Mirac, Beraat ve Qadir geceleri. Şu gecelerde günahlar afu etile, dualar qabul oluna, ibadetler büyük savap ketire. Qırım MDİ matbuat hızmeti
2024 senesi içün diniy taqvim
Опубликовано:
Qırım Cumhuriyeti ve Sevastopol şeeri musulmanları diniy idaresi 2024 senesi (hicriy taqvimi boyunca 1445-1446 ss.) içün divar üstü diniy musulman taqvimni neşir etti. Taqvimde diniy bayramlarımız, mubarek kün ve geceler ile namaz vaqıtları berilgen. İşbu taqvimlerni yerli imamlarğa muracaat etip, er bir camide bedava olaraq almaq mümkün. Taqvim aşağıdaki sponsorlarnıñ destegi ile azırlandı: Lezzet konditer fabrikası, İMPOST şirketi, Kürseitova E.R. şirketi, Furun TM, SIPtrans aviakassası, İMPERİYA şirketi, "S babuşkinoy grâdki" TM, INTERBRUCK şirketi, Family Coffee Shop şirketi, "Mâsniçok" et tükânlarınıñ ağı, "Oktopizza" pitstseriyası, "Şafran" qavehanesi, "Miras" şirketi, "Drujba narodov" şirketi, Novator şirketi, "Yug-moloko", SHERBET TM, AVN-TUR şirketleri. Qırım MDİ matbuat hızmeti
Qırım bölge imamlarınıñ birinci toplaşuvı
Опубликовано:
Qırım Cumhuriyeti ve Sevastopol şeeri musulmanları diniy idaresinde 2024 senesinde bölge baş imamlarınıñ birinci toplaşuvı olıp keçti. Körüşüv esnasında Qırım Müftisiniñ muavini Raim Ğafarov diniy hadimlernen birlikte kelecek yılğa planlarını tizip, ağımdaki aynıñ iş planını belgilediler. Toplaşuvnıñ soñunda imamlar 2024 senesi içün namaz vaqıtlarını bildirgen diniy taqvimlerni ve Qırım MDİ-niñ resmiy neşir organı olğan "Hidayet" gazetasınıñ yañı sanı nushalarını bölgelerde musulmanlar arasında darqatmaq içün aldılar. Qırım MDİ matbuat hızmeti
“AVN-tur” ile 2024 senesinde hacılıq
Опубликовано:
Qırım Cumhuriyeti ve Sevastopol şeeri musulmanları diniy idaresi Qırımnıñ resmiy "AVN-tur" hacılıq operatorı ile birlikte 2024 senesinde hacılıqqa barmağa davet ete. Saudiye akimiyetiniñ qararı ile 2024 senesi hacılıqqa barmağa istegenler 2024 senesi, mart 1-ge qadar bunıñ içün yazılmaq kerekler. Añlaşmanı imzalamaq içün yaşağan yerniñ qaydı (propiskası) ile pasportnı ve çetel pasportnı taqdim etmek kerek. Bu sene 30-35 künge hacılıqqa barmaqnıñ fiyatı 5 500 $, 16 künden az vaqıtqa barmaqnıñ fiyatı ise, 6 000 $ teşkil ete. Hacılıqqa barmağa istegenler qoşma malümatnı Qırım MDİ-niñ resmiy hacılıq operatorınıñ saytında ögrene bileler: https://avntour.ru Yazılmaq içün nevbetteki telefon nomeralarına muracaat etmeli: 8 800 551 3130 +79780908202 +79782026968 +79257158485 Qırım MDİ matbuat hızmeti
Qırım Müftiliginde 2023 senesiniñ neticeleri çıqarıldı
Опубликовано:
Qırım Cumhuriyeti ve Sevastopol şeeri musulmanları diniy idaresi Merkezleştirilgen Diniy Teşkilâtı (Tavriya Müftiyatı) – Qırım Müftiligi, – Qırım musulmanlarınıñ diniy organı olıp, 1991 senesinden başlap çalışa ve Tavriya musulmanları idaresiniñ halefi olıp, qadimden berli Qırım musulmanları kütken sunniy hanefiy ananeniñ devamcısıdır. Qırım Müftiliginiñ davası – Qırımda İslâmnı ğayrıdan tiklemek, diniy-medeniy maarif, İslâmnıñ ananeviy añlayışını saqlamaq ve bölgemizde musulmanlarnıñ maneviyatını ileriletmektir. Qırım Müftiliginiñ maqsadı – Qırım musulmanlarınıñ İslâm dini ve ananeviy diniy ameliyat etrafında birleşmesidir. Mezkür saada faaliyet kösterip, Qırım musulmanları diniy idaresi 2023 senesi yapqan işiniñ neticelerini çıqara ve faaliyetiniñ esas yönelişlerini belgiley. Diniy teşkilâtlar faaliyetiniñ koordinatsiyası Er sene imamlar ihtisas yükseltilüvi kurslarından keçe. Bundan da ğayrı, bu sene "Halq medresesi" kursunı 40 talebe yekünledi. Kursnı yekünlegen imamlar yaşağan yerlerinde, cumhuriyetniñ camilerinde işini devam etti. Munasip bölük bütün Qırım boyunca faaliyet köstergen camiler ve diniy teşkilâtlarınıñ işini idare ete, şu cümleden, cemaat namazlarınıñ ve toplu dualarnıñ keçirilüvine nezaret ete. 2023 senesi devamında Qırım Müftiliginiñ hadimleri "Dünya – ilâhiy ediye" adlı Qırımnıñ Dinlerara Şurasınıñ işinde, dinlerara ve milletlerara işbirlikke bağışlanğan ve ilmiy saada keçirilgen çeşit tögerek masalarda, konferentsiyalarda, toplaşuvlarda faal iştirak etti. Mekteplerde ve aliy oquv yurtlarda farqlı mevzularda lektsiyalar keçirildi. Qırımnıñ bütün bölgelerinde İslâm temelleri kursları, yazlıq kurslar, balalar içün Quran oquvı boyunca dersler ötkerildi. Buña ilâve olaraq, İslâmda cenaze merasimine, Muhammed Peyğamberniñ (s.a.s.) doğumı – Mevlidge, hacılıq mevzusına bağışlanğan lektsiyalar ve seminarlar keçirildi. İmamlar ve din cemiyetleriniñ reisleri farqlı tedbirlerde, şu cümleden teleyayınlarda iştirak ettiler. 2023 senesi Qırım musulmanları Qurultayı 2023 senesi musulmanlar içün müim vaqialardan biri – nevbetteki VII Qırım musulmanlarınıñ esabat-saylav Qurultayınıñ keçirilüvi oldı. Qurultay oktâbr 21 künü Aqmescitte Qırımtatar devlet akademik muzıkalı drama teatrinde olıp keçti. Qurultayda Qırımnıñ er bir tarafından kelgen, yerli musulman din cemiyetleri tarafından saylanıp, yollanılğan vekiller, bundan da ğayrı, Qırım Cumhuriyeti ve Sevastopol şeeri musulmanları idaresiniñ (Tavriya Müftiyatınıñ) azaları, Qırım musulmanları Şurasınıñ azaları ve diniy idaremizge bağlı islâmiy oquv yurtlarınıñ müdirleri birer vekil olaraq iştirak ettiler. Umumiy 327 vekilden 306 vekil Qurultayda azır bulundı. Bundan ğayrı, Qurultayda bir çoq davet etilgen musafir de iştirak etti. Qurultayda Qırım Cumhuriyetiniñ Başlığı Sergey Aksönov, QC Devlet Şurasınıñ Başlığı Vladimir Konstantinov, QC İçki siyaset, malümat ve bağ naziri vazifesini vaqtınca eda etken Albert Qurşutov, QC Milletlerara munasebetler devlet komitetiniñ reisi Ayder Tippa, Fevzi Yaqubov adına QMPU rektorı Çingiz Yaqubov, QC başlığı yanında çalışqan Qırımtatar halq şurasınıñ azaları, Bağçasaray rayon memuriyeti başlığınıñ muavini Enver Ablayev, Aqmescit şeer memuriyetiniñ milletlerara munasebetler bölüginiñ rehberi İslâm Üseinov, cemaat teşkilâtları ve birleşmelerniñ azaları iştirak ettiler. Tedbir Rusiye Federatsiyası, Qırım Cumhuriyeti ve qırımtatar milliy marşlarınıñ icrasınen ve Muqaddes Quran-ı Kerim tilâvetinen başlandı. Qurultaynıñ iştirakçileri ve musafirleri ögünde 2018-2023 seneleri devamında yapılğan işler boyunca esabatınen Qırım Cumhuriyeti ve Sevastopol şeeri Müftisi hacı Emirali Ablayev çıqışta bulundı. Müftiniñ çıqışı neticesinde Qurultay delegatları Müftilikniñ işine yüksek qıymet kesti. Qurultayda köterilgen esas suallerden biri – beş yıllıq yañı müddetke Müftiniñ ve Teftiş komissiyası yañı terkibiniñ saylavı oldı. Qurultay vekilleri Müfti hacı Emirali Ablayevge öz işançlarını ifade etip, oña 2028 senesine qadar Müfti vazifesini eda etmekni avale ettiler. Müfti Qurultay vekillerine destekleri ve işançları içün teşekkür bildirdi. Hacı Ablayevniñ qayd etkenine köre, Qırım Cumhuriyeti ve Sevastopol şeeri musulmanları diniy idaresi ileride de Qırım musulmanları ve qırımtatar halqınıñ inkişafı içün çalışmağa devam etecek. "Biz ana toprağımız Qırımda aydın ve zengin kelecigimizge eminliknen baqmalımız. Çoq yıllar devamında büyük iş yapıldı, amma ileride daa çoq işimiz bar. Er biriñizge, Müftilikniñ hadimlerine professionallik, birlik ve destek içün teşekkürler bildiremiz. Allah sizden razı olsun", – dep, qayd hacı Emirali Ablayev. Qurultay vekilleri Teftiş komissiyasınıñ azalarını da sayladılar, onıñ terkibine beş kişi kirdi. Aqmeçit rayonınıñ baş imamı Löman Abduramanov Teftiş komissiyasınıñ reisi olaraq saylandı. Komissiya azaları – Eskender Suleymanov – Orqapı rayonınıñ baş imamı, Seitasan Asanov – Saq rayonı din cemiyetleriniñ başlığı, Emir-Asan Ümerov – QMDİ neşriyat bölüginiñ rehberi, Rustem Temirov – Seyitler rayonı din cemiyetleriniñ başlığı. Neşriyat faaliyeti 2023 senesi devamında Müftiligimizniñ resmiy neşir organı – "Hidayet" gazetasınıñ 12 sanı çıqtı ve "İkmet çoqrağı" mecmuasınıñ 3 sanı dünya yüzüni kördi. Mecmua musulmanlarnıñ ayatına ait farqlı saalarnı qavrap ala, şu cümleden neşirde diniy, içtimaiy, ruhiy, bala dünyasına ait mevzularda maqaleler derc etile. 2023 senesi namaz vaqıtları taqvimleri, Ramazan ayı içün imsakiye taqvimi neşir etildi. Bir qaç tirajnen "Qurannı oqumağa ögrenem" (Elifbe) ve "Arap ariflerini yazuv defteri" derslik qullanmaları, "Urf-adetimizge köre dua merasimi" kitabı qattı ve yımşaq kapnen tekrar neşir etildi, bundan da ğayrı rus tilinde "Oraza. Post v İslame", "Hac. Molitvı palomnika", "Osnovı islamskih znaniy" kitapları ğayrıdan neşir etildi. "Tecvid. Pravila çteniya Korana" bükleti azırlanılıp, neşirge yollanıldı. İlmiy neşir olaraq, "Sojjönnıye söla, derevni i goroda. Krımskaya ASSR. 1941-1944 gg. Dokumentı, spravoçnıye materialı" kitabı azırlanıldı ve dünya yüzüni kördi. Neşir bölügi "Umra. Molitvı palomnika" ve "Vaazlar kitabı" kitaplarını neşirge azırlay. Diniy tedbirlerni teşkil etüv bölügi ile birlikte "Hidayet" gazetasınıñ 30-yıllığı ve işbu gazetanıñ birinci baş muarriri, şair ve yazıcı Zakir Qurtnezirniñ 90-yıllığına bağışlanğan tantanalı tedbir teşkil etilip keçirildi. Diniy tahsil 2023 senesi Qalay islâmiy ilimler medresesinde diniy musulman orta ihstisas standartlarına uyğun diniy tahsil berilmege devam etti. Al-ı azırda medresede yüzden ziyade talebe oquy. Qızlar ve oğlanlar bölügi, em de hafızlar bölügi çalışa. Zıncırlı medrese ve Orta medreseniñ tamir etilüvi ve ğayrıdan tiklenilüvi boyunca azırlıqlar alınıp barıla. Medreseniñ ğıyabiy bölügi açıldı. Milliy maarif Qırım Cumhuriyeti ve Sevastopol şeeri musulmanları diniy idaresi yerli musulmanlarnıñ diniy maarifine büyük diqqat ayıra. Hususan, bölge ve köy camilerinde İslâm temelleri kursları çalışa, kurslarnıñ diñleyicileri İslâm temellerini ve Quran oquvını ögrene bileler. Bölgelerde em er kişiler, em qadınlar içün kurslar çalışa. Qayd etmeli ki, dersler bedavadır. Diniy idaremiz Qırım Cumhuriyeti ve Sevastopol şeerinde Cezalarnı icra etüv federal hızmetiniñ idaresinen işbirlikte mahküm musulmanlar içün bir sıra lektsiyalar keçirdi. Kütleviy matbuat vastaları ile işbirlik 2023 senesi devamında Qırım Cumhuriyeti ve Sevastopol şeeri musulmanları diniy idaresi Qırım, federal ve halqara kütleviy matbuat vastaları ile sıq işbirlik yaptı. Ramazan ayı devamında canlı yayınlar, "Millet", "Qırım-24" telekanallarında er aftalıq radio ve teleyayınlar, videokopürler ve videokonferentsiyalar, diniy mevzuda yayınlarda iştirak etti. Qırım Müftiliginiñ hadimleri "Saba", "Meraba, Ramazan", "Diniy subet" ve diger teleyınlarda iştirak etti. Buña ilâve olaraq, 2023 senesi basma kütleviy matbuat vastaları ile işbirlik devam ettirildi. Qurucılıq 2023 senesi devamında Qırım Cumhuriyetiniñ aman-aman er bir bölgesinde camilerniñ qurucılığı devam etti. Büyük Cuma caminiñ qurucılığı devam ete, dekabr 9 künü işbu camide birinci cemaat namazı qılındı. Camilerniñ qurucılığı içün 71 topraq saası resmiyleştirildi. 45 binanıñ vesiqaları yapıldı. 2023 senesi 2 caminiñ qurucılığı başlandı ve 16 caminiñ qurucılığı devam etti. Hayriye 2023 senesi devamında QMDİ hayriye saasında büyük iş alıp bardı. "Merhametlik" aktsiyası çerçivesinde 75-ten ziyade ariza qabul etildi ve hastalarnıñ episine yardımlar berildi. Aktsiya 2009 senesinden başlap çalışa. Böyleliknen, 2009 senesinden başlap, 2023 senesine qadar "Merhametlik" aktsiyası çerçivesinde 1 505 kişige hayriye yardımı kösterildi. Fevralniñ 27-sinden başlap, martnıñ 8-ine qadar "Balalarnıñ elleri ve büyüklerniñ eyi niyetinen" şiarı astında "Merhametlik lâlesi" hayriye aktsiyası keçirildi. Aktsiyağa Aqmescit şeeri ve Aqmescit rayonınıñ mektepleri ve bala bağçalarınıñ balaları davet etildi, olar özleri aktsiyanıñ timsali olğan lâlelerni yaptı ve ileride işbu elyapmalar satıldı. Toplanğan paralar ağır hastalıqları olğan balalarnıñ tedaviylenüvine yollanıldı. Yılnıñ başında Qırım Müftiligi Qırım Başlığı yanındaki qırımtatarlar şurası ile beraber fevralde Türkiyeniñ cenübiy-şarq tarafında ve Suriyeniñ şimaiy qısımında yüz bergen yer teprenüviniñ qurbanlarına ve zarar körgen insanlarğa destek köstermek içün para topladı. Rusiye Federatsiyasındaki Türkiye Cumhuriyeti ve Suriye Arap Cumhuriyetiniñ elçihaneleri arqalı 10 400 000 (on million dört yüz biñ) ruble yollanıldı, olardan 3 mln ruble Suriyege ayırıldı, 7,4 mln ruble ise, Türkiyege yollanıldı. Buña ilâve olaraq, diniy idare "Ramazanda merhametlik qutusı", "Saqat balalarğa bahşış", "Qurbanıñnı medresege ediye et", "Balanı mektepke azırla" aktsiyalarını keçiridi. Bundan da ğayrı, er ay yañı bölgelerge ve MAO (mahsus arbiy operatsiya) keçirilgen bölgelerge yardım yollanıla. Tedbirler 2023 senesi devamında Qırım musulmanları diniy idaresi tarafından bir sıra farqlı tedbirler keçirildi, hususan, Noman Çelebicihannıñ hatırasına Qırım Cumhuriyeti ve Sevastopol şeeriniñ mektep talebeleri arasında "Ebediy yüreklerimizde" III edebiy yarışı, "Ana tilim – ğururım" bütün Qırım yarışı olıp keçti. "Alem-i nisvan" islâmiy medeniy-maarif qadınlar merkezi açıldı. Mubarek Ramazan ayı devamında iftarlar ötkerildi, şu cümleden, Qırım Müftisi adından ve Qırım Cumhuriyetiniñ Başlığı adından cumhuriyet köleminde iftarlar keçirildi. Qırım Müftiliginiñ faaliyetinde ayrı yerni balalar ile çalışuv tuta. Balalar içün Oraza bayramı ve Qurban bayramı ötkerile. Ruhiy, psihiatrik, nevrologik ve nutuq inkişafında problemaları olğan balalarnıñ qorantaları içün bayramlar teşkil etildi. "Vatan qoruyıcıları" fondunıñ destegi ile MAO iştirakçilerniñ qorantaları içün bayram teşkil etildi. Bundan da ğayrı, ananeviy talaqa işleri de keçirildi. Tış faaliyet ve işbirlik Qırım Müftiligi farqlı bölge ve halqara tedbirlerde faal iştirak ete. 2023 senesi devamında QMDİ iştirak etken esas tedbirler arasında Fevzi Yaqubov adına Qırım müendislik ve pedagogika universitetinde olıp keçken "İslâmda ananeviy olmağan aqıntılar ve fırqalarnı belgilev", Qaraçay-Çerkessiyada keçirilgen "Zemaneviy geosiyasiy tehlikeler şaraitinde maneviy-ahlâqiy qıymetlerniñ pekitilüvinde İslâmnıñ rolü" halqara ilmiy-ameliy konferentsiyası, "Galimcan Barudi adına oquvlar" XVI Halqara teologik ilmiy-tahsil konferentsiyasınıñ birleştirilgen plenar oturuşı, Rusiyede fetvalar boyunca II Halqara simpoziumı "Rusiye fetvalarnıñ qabul etilüviniñ usulları: mirasnıñ analizı ve zemaneviy tecribe", tedbir Moskva şeerinde Barudi adına oquvlar çerçivesinde olıp keçti, Saratov şeerinde olıp keçken Eduard Ganeyev adına II Bütün Rusiye Quran oquyıcıları yarışı. Bundan da ğayrı, Qırım Müftiligi "Beyaz çeçek" er yıllıq hayriye aktsiyasında, "EtnoSMİ" milletlerara jurnalistika yaşlıq forumında, Eşref Şemi-zade adına №42 orta mektebiniñ 25-yıllığınıñ qayd etilüvine bağışlanğan tedbirlerde, ulu naşir ve maarifçiniñ 172-yıllığına bağışlanğan "İsmail Gasprinskiyniñ alemi" edebiy oquvlarında iştirak etti. Bundan da ğayrı, diniy idare "Elâlnı saqlav ve inkişaf fondu" teşkilâtı ile işbirlik aqqında añlaşmanı imzaladı. Elâllıq sertifikatsiyası 2008 senesinden başlap Qırım Cumhuriyeti ve Sevastopol şeeri musulmanları diniy idaresi erkânında "Elâl" sertifikatsiya ve standartizatsiya merkezi çalışa. 2023 senesi 29 şirket elâllıq sertifikatlarını devam ettirdi: "Drujba Narodov Nova" – elâl tavuq; Muratov Mustafa Enveroviç, "Okto-pizza" fast-fud, "POMPEI" pitstseriyası; Osmanov Bekir Zikiriyayeviç; Urkumetova Dilâra Tairovna; "Mimi" fast-fudlar ağı; Mamedov Ekrem Bahtıyaroviç, "HAYAT" TM; "Samedinov Tair Aci-Ametoviç" TM, "Taze et" et tükânı; Ablayev Mustafa Aliyeviç, "Simurg" qavehanesi; Aliyev Marlen Seitâhyayeviç, "Temiz" TM; Anafiyev Mübiy Refatoviç, "Bereg Krıma" TM ve "El Lezzet" TM; "İMPERİYA" MSC, "Krımskiy gurman" TM ve "S babuşkinoy grâdki"; Arkan Ölga Petrovna; "ZARÂ", "KRIMSKIY SULTAN" TM; Abibulayev Enver Fikretoviç, "Osman" qavehanesi; Abdurahmanov Emil Nusretoviç, "GulNar" qavehanesi; Bücema Yasin, "Kapadokya" qavehanesi; Bekbayev Ruslan Edemoviç; Minaliyev Eldar Rinatoviç; Calilov Azim Rizayeviç; Muhamedov Aziz Alizaroviç; Haybullayev Ayder İsayeviç, "ALEM" et tükânlarınıñ ağı; "Hanno Keysings"; "Krımskiye lakomstva", "Aynur" TM ve "Krımskiye lakomstva"; "Sladkiy Yug", "Sherbet" TM ve "Crımean Sweets"; Kurtseitova Elvina Refatovna; "Yug Moloko", "Dolina legend" TM, "Pervomayskoye moloko", "Molkombinat Razdolnoye Krım", "NOVATOR", "Azbuka Krıma", "Cankoyskoye moloko", Cankoyskiy sır" "Milaya derevnâ" TM; Seydametov Riza İbragimoviç, "Şafran" qavehanesi. Yañı sertifkatlarnı nevbetteki işhaneler aldı: Hasanov Farhad Sidikoviç; Mambetov Dilâver Farihoviç; Abibullayev Lenur Nuriyeviç; Kasımova Zulfiye Mahmadovna; Paşiyev Refat Kudusoviç, "Mâsnoy №1"; Abduramanov Femi Ametoviç; Asanov Marlen Rustemoviç; İbragimov Osman Yunusoviç; "AMİR NATUR DARM"; "FREŞ"; Kursaitova Lenoza Rişatovna, "Bardak" qavehanesi, "PKF "Larand Ltd", "Alkadar" bala lageri. Hac Ağır sanktsiya basımı ve bunıñ neticesinde peyda olğan qıyınlıqlarğa baqmadan, 2023 senesi hacılıq yüksek seviyede, zorluqsız keçirildi. Bu sene Müftiligimizge 300 insan içün kvota ayırıldı. Qırım musulmanları diniy idaresiniñ resmiy hacılıq agenti – "AVN TUR" şirketidir. Büyük Cuma Cami Dekabr 9-da Qırım musulmanları içün çoq beklenilgen bir kün oldı. Bu künü Büyük Cuma camide birinci cemaat namazı qılındı. Namaznı Qırım Müftisi hacı Emirali Ablayev keçirdi. Namazda 500-den ziyade kişi iştirak etti, şu cümleden, din erbapları, bölgelerniñ baş imamları, yerli din cemiyetleriniñ vekilleri, Qırım Müftiliginiñ hadimleri, baş qurucı şirketiniñ temsilcileri, qurucılar, akimiyet vekilleri ve cemaat erbapları. Qırım musulmanlarınıñ yolbaşçısı dindaşlarımızğa muracaat eterek, işbu tarihiy vaqianıñ bütün Rusiye musulmanları içün müimligini ayrıca qayd etti. "Bugün Qırım ve bütün Rusiye musulmanları içün quvançlı bir kün. Biz bu vaqianı 50 yıldan ziyade bekledik. Bizge şu aydın, büyük ve dülber yerde, bizim yañı ve çoq beklenilgen Cuma camimizde toplaşmaqnı ve birinci namaznı qılmaqnı qısmet etken Yüce Rabbimizge şükürler olsun. Şu caminiñ er bir musulman içün barmağa tırışqanı yer olması, Qırım ve dünya musulmanları, bütün insaniyet içün yüzyıllar devamında hızmet merkezi olması içün Allahqa niyaz etemiz. Cuma cami bizim içün birlikniñ ve nesiller arasındaki bağnıñ timsalidir", – dedi Qırım Müftisi. Hacı Emirali Ablayev Qırım Cumhuriyeti ve Sevastopol şeeri musulmanları diniy idaresi adından cami qurucılığına nezaret etip, destek bergen Rusiye Federatsiyasınıñ Prezidenti Vladimir Putinge, ve, bunen beraber, Qırım başlığı Sergey Aksönov ile yardımı tiygen er keske teşekkürler bildirdi. Namazdan soñ toplanğanlar Vatanımıznıñ eyiligi, barışıqlıq ve Rusiyedeki bütün halqlarnıñ muabbetligi içün topluca dua ettiler. Planlar Qırım Müftiligi bu sene çalışqan leyihalarnı, tahsil sistemasını, bu sene kirsetilgen tahsil standartlarını çalıştırmaq, mütehassıslarnı azırlamaq, imamlarnıñ ihtisasını yükseltmek, eski camilerni qaytarmaq ve yañı camilerni qurmaq planlaştıra. Müftilikniñ esas vazifesi – musulmanlarğa temel diniy bilgilerni bermek ve olarnıñ bilgi seviyesini yükseltmek, musulmanlarnıñ diniy ihtiyaclarını yerine ketirmek, ekstremizmge yol bermemek, Ehlü sunnet vel-cemaat ananeviy añlayışımıznı saqlamaq ve qırımtatar halqınıñ diniy ananesini kelecek nesillerge yetkizmektir. İleride de milletniñ sağlam keleceginiñ temeli olğan yaş nesilniñ terbiyesine büyük diqqat ayırılacaq.
Qırım Müftiyatı Cemil Bibişevniñ qorantasına taziye bildire
Опубликовано:
Qırım Cumhuriyeti ve Sevastopol şeeri musulmanları diniy idaresi Qırım Müftiyatınıñ sabıq hadimi Cemil Bibişevniñ ölümi munasebetinen qorantası ve yaqınlarına içten taziyesini bildire. "Biz bu acını siznen beraber yaşaymız, merhumnıñ ailesine ve yaqınlarına içten taziyemizni bildiremiz. Bu kederge dayanmaq içün Allah olarğa küç ve sabır bersin", – dedi Qırım Müftisi hacı Emirali Ablayev. "Şübesiz, epimiz Allah içünmiz ve qaytuvımız Oñadır" ("Baqara" suresi, 2/156). Allah rahmet eylesin! Qırım MDİ matbuat hızmeti
MAO iştirakçileriniñ qorantaları içün bayram
Опубликовано:
Qırım Cumhuriyeti ve Sevastopol şeeri Müftisi hacı Emirali Ablayevniñ avalesi ile "Alem-i Nisvan" İslâm medeniy-maarif qadın-qız merkezinde mahsus arbiy operatsiya iştirakçileriniñ qorantaları içün bayram keçirildi. Balalarnı ve analarnı bir tantanada toplamağa "Vatan qoruyıcıları" devlet fondu yardım etti. Bayram musafirlerini QMDİ MDT diniy tedbirlerni teşkil etüv bölüginiñ rehberi, qadın-qızlar merkezniñ başlığı Zenife Ablayeva selâmladı. "Siz ilk kere merkezimizde bulunasıñız, qadınlar merkezimizge hoş keldiñiz. Biz epimiz farqlımız, amma, dinimiz ve milletimizge baqmadan, bizni birleştirgen bir şey bar – biz epimiz qadınmız, anamız, quvanç ve kederimizniñ sebepleri aynıdır. Ve, elbette, bizni birleştirgen bir maqsat bar, o da – dünyada barışıqlıq, balalarımıznıñ sağlığı ve amanlığıdır. Buña irişmek içün biz birleşmek kerekmiz", – dedi Zenife Ablayeva. Bayramda balalar içün animatorlarnıñ çıqışları ve tatlı sofralar ile tolu ve eglenceli medeniy programma azırlandı. Balalarnıñ anaları içün de eglenceler teşkil olundı: ücretsiz resim yapmaq ve vitrajlar boyalamaq boyunca master-klasslar, qadınlar klinikasından davet etilgen ekim tarafından qadın sağlığınıñ profilaktikası boyunca lektsiya keçirildi. Tedbirniñ soñunda bütün balalarğa bahşışlar berildi. Qırım MDİ matbuat hızmeti
“Halq medresesi” kursunıñ mezunlarına diplomlar taqdim etildi
Опубликовано:
Qırım Müftiliginde "Halq medresesi" kursunıñ mezunlarına diplomlar taqdim etildi. Mühtelif yaşlardaki talebeler İslâm temelleri, Quran oquvı ve diniy hızmet boyunca programmanı tamamladılar. "Halq medresesi"-niñ bitiricilerini Qırım Cumhuriyeti ve Sevastopol şeeri Müftisi hacı Emirali Ablayev hayırladı. O, din erbaplarına ğayretleri, dinni ögrenmek ıntıluvları içün teşekkür bildirdi ve ilerideki hızmetlerinde muvafaqiyetler tiledi. "Allahnıñ taqdiri ile artıq üzeriñizde halqımız, dindaşlarımıznıñ episi içün büyük mesüliet bar, sizni büyük ve iç de qolay olmağan iş bekley. Siziñ vazifeñiz – semetdeşlerimizge hayır ve fayda ketirmek, olarğa farqlı meseleleriniñ çezilmesine yardım etmek, hızmet yerleriñizde dinimiz, tilimiz, urf-adetimiz ve medeniyetimiz kibi qıymetlerimizni saqlamaq, tiklemek ve ileriletmektir. Eminim, Yüce Allah ve Vatanımız içün yapqan emekleriñiz büyük fayda ketirir", – dedi Qırım Müftisi. Kursnıñ beş mezunı artıq birer imam olaraq çalışa, camilerde beş vaqıt namaznı ve cuma namazlarını keçire. Hatırlatamız, Müftiligimizniñ "Halq medresesi" leyhası üç yıldır çalışıp, 200-den ziyade mezun berdi. "Halq medrese"-siniñ diplomları imam olaraq çalışmağa ve diniy faaliyet köstermege aq bere. Leyhanıñ maqsadı – Qırım Cumhuriyetinde çalışacaq mütehassıslarımıznı yetiştirmektir. Qırım MDİ matbuat hızmeti
Bir bala lageri elâllıq sertifikatını aldı
Опубликовано:
Qırım Cumhuriyeti ve Sevastopol şeeri musulmanları diniy idaresinde "PKF "Larand LTD" şirketiniñ "Alkadar" adlı tedaviylev bala lagerine elâllıq sertifikatı berildi. Qırım Cumhuriyeti ve Sevastopol şeeri Müftisi hacı Emirali Ablayev lagerniñ rehberligine insanlarnıñ eyiligi oğrunda eyi çalışmalar tiledi. İhtar: Elâllıq sertifikatını almağa istegen iş adamları QMDİ "Elâl" sertifikatsiya merkeziniñ başlığı Remzi Qurtdedege nevbetteki telefon boyunca muracaat ete bileler: +79780741847, ya da el.adres: halal@qmdi.ru Qırım MDİ matbuat hızmeti
Dinlerara iş taqımınıñ yekünleyici toplaşuvı
Опубликовано:
Qırım Cumhuriyeti ve Sevastopol şerri Müftisiniñ muavini Muhammed İslamov Qırım Cumhuriyeti ve Sevastopol şeeri boyunca Cezalarnıñ icra etilüvi Federal hızmeti idaresinde olıp keçken Dinlerara iş taqımınıñ yekünleyici toplaşuvında iştirak etti. "Er bir dinniñ temsilcisi 2023 senesi yapqan işi içün esabat berdi. Kerçekten de, çoq iş yapıldı. Qıyın vaziyetke tüşken dindaşlarına yardım etmek, olarnı doğru yolğa yönlendirmek içün er kes elinden kelgenini yaptı. Bundan da ğayrı, qayd etmege isteyim, er bir insan Qırım Müftiligine muracaat etip, yardım ala bile", – dedi Muhammed İslamov. Dinlerara iş taqımı, em de, kelecek 2024 senesi içün iş planını belgiledi. Qırım MDİ matbuat hızmeti
Canköy rayonı din cemiyetleriniñ reisi açıq ders keçirdi
Опубликовано:
Canköy rayonı din cemiyetleriniñ reisi Aziz Memetov Canköy şeeriniñ №7 mektebinde diniy medeniyetler ve zemaneviy etika boyunca "Dünya dinlerinde sanat" mevzusında açıq derste iştirak etti. Ders 4 sınıf talebeleri içün keçirildi. Bundan da ğayrı, tedbirde Rus Ortodoks Kilisesiniñ (Moskva Patriarhatı) Qırım Cumhuriyeti Canköy Yeparhiyasınıñ Yarkoye köyü din cemaatınıñ papazı Yevgeniy Şleyf iştirak etti. Ders çerçivesinde faal iştirak etken talebeler, – Edem Velişayev, Damir Abduramanov, Timur Usmanov ve Asan Sadlayev ayrıca qayd etildiler. Qırım MDİ matbuat hızmeti