Milletlerara munasebetler boyunca devlet komitetinde Qırım musulmanlarınıñ hacılıqqa azırlanuvı boyunca muşavere olıp keçti. QMDİ tışqı munasebetler ve hacılıqnı teşkil etüv bölüginiñ rehberi Artur Reşitov muşavere iştirakçileri ögünde çıqışta bulunıp, devlet komitetiniñ er yıl musulmanlarnıñ muqaddes yerlerge barmasınıñ teşkil etilüvine destek köstergenini qayd etti.
“Bu sene 270 musulman Qırımdan hacılıqqa yol alacaq. Biz hacılıqqa acele rejimde azırlanamız, çünki Saudiye Arabistanı uzun vaqıtttan berli hacılıqnıñ keçirilüvi boyunca soñ qararını berip olamadı, amma, niayet, müsbet qarar alındı. Şu sebepten bazı qıyınlıqlar peyda oldı, misal olaraq, turnıñ fiyatı alâ daa belgilenmedi”, – dedi Artur Reşitov.
Artur Reşitovnıñ sözlerine köre, hacğa baracaq musulmanlarnıñ Aqmescitten Moskvağa qadar barması içün Qırım Cumhuriyetiniñ Naqliye nazirliginiñ yardımı kerek. “Kün evel berilgen malümatlarğa köre, hacılar Moskvada iyunniñ 25-30 künleri olmaq kerek, iyül 15-25 künleri ise, Vatanğa qaytacaqlar”, – dedi tışqı munasebetler ve hacılıqnı teşkil etüv bölüginiñ rehberi.
Tedbir devamında hacğa baracaq musulmanlarnıñ Rusiyeden çıqmaları içün çetel pasportlarınıñ acele rejimde almaları, yolcularnıñ aşılanuvı, hacğa baracaqlarnıñ taqımlarına ekimlerniñ refaqat etmesi imkânı, çetelge uçuş etmek içün yolcularnıñ aeportqa alıp ketilmesi ve Rusiye Federatsiyasından çıqıp olmaq içün acele şekilde askeriy qayd şeadetnamesiniñ alınması meseleleri muzakere etildi.
Muşaverede Qırım Cumhuriyeti boyunca İçki işler nazirliginiñ Migratsiya meseleleri boyunca idaresiniñ, Qırım Cumhuriye Sağlıq nazirliginiñ, Qırım Cumhuriyeti ve Sevastopol şeeri boyunca İnsan aqlarınıñ qorçalanuvı ve insan eyiligi nezareti boyunca federal hızmetiniñ regionlarara idaresiniñ ve Qırım Cumhuriyeti Naqliye nazirliginiñ temsilcileri iştirak ettiler.
Hatırlatamız, Qırım Cumhuriyeti ve Sevastopol şeeri musulmanları diniy idaresiniñ resmiy hacılıq agenti “AVN TUR” şirketidir.
Qırım MDİ matbuat hızmeti